„ЏАН“: Спој на ориенталните носии со модерен стил

Со поддршка на Министерство за култура и туризам на Северна Македонија и во соработка со Институтот „Јунус Емре“ Скопје во Скопје се одржа промотивен настан на новата колекција на модната дизајнерка која се истакнува со своите креации кои претставуваат спој на традиционални ориентални носии од 19. век со модерен стил, Ирина Тошева, со наслов „ЏАН“, која нуди нова перспектива во модерни адаптации на алатурка носии, информираат од Институтот „Јунус Емре“ - Скопје.

„Традиционалните носии и културните елементи изложени на настанот, кој патем претставува и белег на нашата заедничка историја и култура со Северна Македонија, ни даваат на знаење дека и покрај сите различности, регионов има заеднички вкусеви и естетска перцепција и црпи од ист цивилизациски басен“, се вели во соопштението на Институтот „Јунус Емре“ во Скопје.

Ирина Тошева која ја претстави Северна Македонија на Летната модна школа – 2025 организирана од страна на Институтот „Јунус Емре“, преку ова свое уникатно, оригинално и иновативно дело, дизајнирано со употреба на еколошки материјали, дигитално сечење без отпад, создава не само стилски, туку и еколошки и атрактивни парчиња. Овој уникатен проект истовремено ја зајакнува и врската помеѓу минатото и сегашноста, и ја инспирира модната индустрија и љубителите на модата во насока на развојот на културна свест при одржливи практики.

Учесниците на настанот ја имаа можноста во придружба на музичка изведба од Женскиот младински хор на МКЦ во живо да ги видат делата на Ирина Тошева.