Врховниот лидер на Иран, ајатолахот Али Хамнеи, е убиен во израелски и американски напади, соопштија иранските државни медиуми, што предизвика повици за одмазда од страна на Револуционерната гарда.

Државната телевизија во неделата објави 40-дневна жалост и седум неработни денови по убиството на 86-годишниот врховен лидер на земјата, кој беше на власт од 1989 година.

„Со маченичката смрт на врховниот лидер, неговиот пат и мисија ниту ќе бидат изгубени ниту заборавени, туку ќе бидат продолжени со уште поголема решителност и жар“, изјави водител.

Во меѓувреме, Иранската револуционерна гарда вети дека ќе ги казни „убијците“ на Хамнеи.

„Раката на одмаздата на иранската нација нема да ги поштеди од тешка, одлучна и неизбежна казна убијците на Имамот на уммата“, се наведува во соопштението на Гардата.

Иранските медиуми објавија дека ќерката, зетот и внуката на врховниот лидер исто така биле убиени во американските и израелските напади.

„По воспоставување контакт со информирани извори од домот на Врховниот лидер, за жал е потврдена веста за маченичката смрт на ќерката, зетот и внуката на Револуционерниот лидер“, објави агенцијата Фарс и други ирански медиуми.

Државните медиуми соопштија дека Иран прогласил 40 дена јавна жалост по убиството на Хамнеи.

Претходно во саботата, американскиот претседател Доналд Трамп и израелскиот премиер Бенјамин Нетанјаху тврдеа дека Хамнеи е „мртов“.

„Ова не е само правда за народот на Иран, туку и за сите големи Американци и луѓето од многу земји ширум светот, кои биле убиени или осакатени од Хамнеи и неговата банда крвожедни насилници“, изјави Трамп.

„Утринава, во моќен изненадувачки напад, го уништивме комплексот на тиранинот Хамнеи“, изјави Нетанјаху во видео-обраќање.

Напад врз иранскиот лидер додека наводно се сретнувал со најтесниот круг

Израел и САД го темпирале нападот врз Иран во саботата така што се совпаднал со состанокот што Хамнеи го одржувал со своите најблиски соработници, според два американски извори и американски претставник запознаен со случајот.

Израел тврди дека Хамнеи бил убиен заедно со високи функционери, меѓу кои Али Шамхани, поранешен секретар на Советот за национална безбедност, и Мохамад Пакпур, командант на Корпусот на исламската револуционерна гарда (ИРГК).

Два ирански извори за агенцијата Ројтерс изјавиле дека Хамнеи во саботата се сретнал со Шамхани и секретарот на Врховниот совет за национална безбедност Али Лариџани на безбедна локација непосредно пред почетокот на нападите.

Висок израелски претставник изјавил за Ројтерс дека телото на Хамнеи било пронајдено.

Трамп на својата платформа Truth Social објави дека врвниот ирански лидер бил убиен откако разузнавачките служби ги утврдиле неговите движења.

„Тој не можеше да ги избегне нашите разузнавачки и високо софистицирани системи за следење и, во тесна соработка со Израел, немаше ништо што тој или другите лидери што беа убиени заедно со него можеа да направат“, напиша Трамп.

Двата американски извора и американскиот претставник, кои зборувале под услов на анонимност, изјавиле дека потврдата за состанокот на Хамнеи со највисоките советници ја ставила во движење израелско-американската воздушна и поморска операција.

Американскиот претставник изјавил дека нападот морал најпрво да го погоди Хамнеи за да се задржи елементот на изненадување, сугерирајќи дека постоела загриженост оти иранскиот лидер би можел да се скрие доколку има можност.

Еден американски извор навел дека првично се очекувало Хамнеи да го одржи состанокот во саботата навечер во Техеран.

Но разузнавачките информации откриле состанок во саботата наутро, по што нападите биле забрзани, изјавиле изворите.

Локацијата на состанокот не била веднаш позната.

Но високообезбедениот комплекс на Хамнеи во Техеран бил погоден на почетокот на операцијата, а сателитските снимки што ги прегледал Ројтерс потврдиле дека бил уништен.