Кувајт ги прекина комерцијалните летови во среда откако во ирански напад со беспилотно летало бил погоден главниот аеродром во земјата, оштетувајќи патничка зграда и повредувајќи неколку лица.

Авиокомпанијата „Кувајт ервејс“ денес го прекина својот авиосообраќај до понатамошно известување по иранските напади што го нарушија функционирањето на меѓународниот аеродром во Кувајт.

Во соопштението пренесено од кувајтскиот весник Ал Анба, националниот авиопревозник наведе дека одлуката е донесена поради „моментните околности и во соработка со властите за цивилно воздухопловство на земјата“.

Од авиокомпанијата соопштија дека откажаните летови ќе бидат презакажани, а патниците ќе бидат известени за новите термини на полетување преку податоците за контакт оставени при резервацијата.

Портпаролот на Министерството за одбрана, бригаден генерал Сауд Абдулазиз Ал-Отаиби, изјави дека „голем број непријателски беспилотни летала го нападнале меѓународниот аеродром во Кувајт, предизвикувајќи сериозна штета на патничкиот терминал и ранувајќи повеќе лица“.

Министерството не даде веднаш детали за степенот на повредите.

Исламската револуционерна гарда на Иран (ИРГЦ) соопшти дека нападите врз американските бази во Кувајт биле извршени како одговор на американскиот напад врз островот Кешм во Јужен Иран претходно денес.