Хрватскиот премиер Андреј Пленковиќ пред Генералното собрание на ОН ја критикуваше Србија за оддавањето официјални почести на починатиот осуден воен злосторник Ратко Младиќ, нарекувајќи го потегот навреда за правдата.

„Воените и официјалните почести што му беа оддадени на Младиќ во Србија беа навреда за неговите жртви и за пресудите на меѓународните судови“, рече Пленковиќ пред светските лидери за време на 81-та Генерално Собрание на ОН во Њујорк.

Пленковиќ тврди дека автентичното помирување низ цела Европа бара директно соочување со историските злосторства, инсистирајќи дека државите мора да ги почитуваат жртвите и да го отфрлат институционалното величење на сторителите. Учеството на државите во настаните што го слават Младиќ останува „тотално некомпатибилно со вредностите на унијата на која Србија се стреми да се приклучи“, додаде тој.

Тој потсети дека иако злосторствата на Младиќ кулминираа со геноцидот во Сребреница во 1995 година, неговите дејствија започнаа порано со бомбардирање на хрватските градови, убиства на цивили и уништување на културната и индустриската инфраструктура.

Младиќ, широко познат како „Касапот на Босна“, доби доживотна казна затвор од Меѓународниот кривичен трибунал за поранешна Југославија во 2017 година за геноцид, воени злосторства и злосторства против човештвото извршени за време на конфликтот од 1992 до 1995 година, пред да почине во притвор во Хаг во август оваа година.

Осврнувајќи се на Блискиот Исток, Пленковиќ нагласи дека меѓународната заедница мора да ги примени истите законски стандарди за заштита на цивилите и обезбедување непречен хуманитарен пристап во Газа. Тој ја потврди поддршката на Хрватска за договорено решение за две држави, кое ќе им овозможи на Израелците и Палестинците да живеат во мир и безбедност.