Откако заврши групната фаза од европските квалификации, познати се 42 од 48 учесници на Светското првенство следната година, кое заеднички ќе го организираат Канада, Мексико и САД.

Од 16 европски селекции кои ќе настапат на Мундијалот, Шпанија, Швајцарија, Шкотска, Белгија и Австрија го обезбедија своето место на Светското првенство во вторник, приклучувајќи се на претходните победници на групи во квалификациските групи- Франција, Англија, Хрватска, Португалија, Норвешка, Германија и Холандија.

Ждрепката за групите на Светското првенство ќе се одржи на 5 декември во Центарот „Кенеди“ во Вашингтон.

Конечниот список на сите учесници на Светското првенство ќе биде објавен кон крајот на март следната година, кога се закажани дополнителни квалификации во Европа и интерконтиненталните квалификации.

Италија, Данска, Туркије, Украина, Полска, Чешка, Велс, Словачка, Ирска, Албанија, Босна и Херцеговина, Косово, Шведска, Романија, Северна Македонија и Северна Ирска ќе одат во дополнителните европски квалификации.

Од нив, само четири екипи ќе се квалификуваат за Светското првенство.

Ждрепката за баражот на европските квалификации ќе се одржи во четврток во 13 часот во Цирих, а 16 репрезентации се поделени во четири групи.

Прв шешир: Италија, Данска, Туркије, Украина

Втор шешир: Полска, Велс, Чешка, Словачка

Трет шешир: Република Ирска, Албанија, Босна и Херцеговина, Косово

Четврти шешир: Шведска, Романија, Северна Македонија и Северна Ирска

Во полуфиналните натпревари, репрезентациите од првиот шешир ќе бидат домаќини на репрезентациите од четвртиот, а репрезентациите од вториот ќе ги пречекаат репрезентациите од третиот шешир.

Победниците ќе играат во финалето за пласман, а домаќинот ќе биде одреден со ждрепка.

Плејоф дуелите ќе се играат на 26 и 31 март следната година.

Интерконтиненталните квалификации, кои ќе се одржат во Мексико во март, ќе ги доведат последните два учеснички на Светското првенство, а ќе ги вклучат Нова Каледонија како претставник на Океанија, Боливија од Јужна Америка, ДР Конго од Африка, Ирак од Азија и Јамајка и Суринам од КОНКАКАФ.

Учесници на Светското првенство досега:

Домаќини: Мексико, Канада, САД (3)

Африка: Алжир, Зелено`ртските Острови, Египет, Гана, Брегот на Слоновата Коска, Мароко, Сенегал, Јужна Африка, Тунис (9)

Азија: Австралија, Иран, Јапонија, Јордан, Катар, Саудиска Арабија, Јужна Кореја, Узбекистан (8)

Јужна Америка: Аргентина, Бразил, Колумбија, Еквадор, Парагвај, Уругвај (6)

КОНКАКАФ (Конфедерацијата на фудбалските сојузи од Северна и Централна Америка и Карибите) Куракао, Панама, Хаити(3)

Европа: Франција, Англија, Хрватска, Португалија, Норвешка, Германија, Холандија, Швајцарија, Шпанија, Белгија, Шкотска, Австрија (12)

Океанија: Нов Зеланд (1)