Рускиот претседател Владимир Путин им забрани на поединци да изнесуваат готовина во износ поголем од 1 милион рубљи (12.300 долари) од Русија кон земјите од Евроазиската економска унија (ЕАЕУ), Азербејџан, Таџикистан и Узбекистан, се наведува во декретот објавен во вторникот.

Ограничувањето важи и за правни лица и за индивидуални претприемачи, без оглед на износот на готовина што сакаат да го изнесат, според декретот објавен на официјалниот руски портал за правни информации.

Исклучоци се предвидени за готовина што се изнесува преку аеродроми определени од руската влада, како и во случаи кога банкарски изводи потврдуваат дека парите биле подигнати од сметка што му припаѓа на лицето кое ги изнесува.

Претходниот лимит за поединци изнесуваше противвредност од 100.000 долари, а ограничувањата не важеа за Азербејџан, Таџикистан или Узбекистан.