Министерот за надворешни работи и надворешна трговија на Северна Македонија, Тимчо Муцунски и министерот за европски прашања Орхан Муртезани денес во Брисел остварија средба со високата претставничка за надворешни работи и безбедносна политика на Европската Унија, Каја Калас.

Како што соопшти Министерството за надворешни работи и надворешна трговија, средбата е одржана во рамките на нивната работна посета на Брисел, во контекст на континуираната посветеност на државата на европскиот интегративен процес и заедничките напори за продлабочување на партнерството со Унијата во областа на безбедноста и одбраната.

Муцунски и Муртезани на средбата ја потврдиле посветеноста на реформите, европската агенда и унапредувањето на соработката со ЕУ во доменот на безбедноста и одбраната.

„Тие ја реафирмираа и целосната усогласеност со Заедничката надворешна и безбедносна политика на ЕУ, поддршката за Украина, како и значењето на регионалната поврзаност и стратегиските инфраструктурни проекти, меѓу кои и Коридор 8“, се додава од Министерството.

Двајцата министри упатиле порака за важноста од предвидлива, фер и опиплива европска перспектива за целиот регион, нагласувајќи дека забрзаната и фер динамика на процесот ќе придонесе за зајакнување на кредибилитетот на проширувањето, демократската отпорност и безбедноста на регионот и Европа.