Рускиот претседател Владимир Путин во петокот изјави дека Москва не ја исклучува можноста за подобрување на односите со европските земји.

Зборувајќи на состанокот на Рускиот совет за безбедност, Путин рече дека Русија никогаш не ја исклучила можноста за развој на овие односи, како и нивното обновување, според транскриптот објавен од Кремљ.

Путин повторно го наведе соборувањето на промосковскиот украински претседател Виктор Јанукович, по масовните протести во 2014 година, како причина за раздорот.

Рускиот претседател зборуваше за државниот удар што го поддржаа САД и неколку европски земји, јавува агенцијата ДПА.

Според него, ова го означи почетокот на низа трагични настани што сè уште се одвиваат во Украина денес.

„Советот за безбедност треба да ја разгледа состојбата на односите со европските земји, а особено со Европската Унија“, заклучил Путин.

На истиот состанок, рускиот министер за надворешни работи Сергеј Лавров презентираше проценка на овие односи, но Кремљ не ги објави деталите од неговото обраќање.

Кремљ, пал, во петокот ги негираше извештаите дека претседателот Владимир Путин побарал од водечките бизнисмени да донираат пари за стабилизирање на финансиите на Русија додека војната во Украина продолжува.

Независните руски медиуми Бел и Фајненшл тајмс ја објавија информацијата, повикувајќи се на неименувани извори, откако Путин одржал состанок зад затворени врати со бизнис лидерите во четвртокот.

„Не е вистина дека Путин упатил такво барање“, изјави портпаролот на Кремљ, Дмитриј Песков, за новинарите.

Но тој додаде дека еден од учесниците на состанокот рекол дека сака да донира „многу голема сума пари“ на државата.

„Ова беше апсолутно негова иницијатива, а не на претседателот Путин. Иако, се разбира, шефот на државата ја поздрави таквата иницијатива“, додаде Песков.