Реал Мадрид во четврток објави дека го продолжил договорот со бразилскиот интернационален напаѓач Винисиус Јуниор до летото 2032 година.
Финансиските детали од договорот не беа откриени
Според тековниот договор, 26-годишниот Винисиус би можел да стане слободен агент следното лето, а во последните денови се водеа преговори во кои двете страни се обидуваа да ја продолжат соработката по најповолни услови.
За Бразилецот најголем интерес покажуваше лондонски Арсенал, а пречка за нов договор со „кралевите“ уште од минатото лето беше барањето на Винисиус да има иста плата од 30 милиони евра, како и француската ѕвезда Килијан Мбапе.
Раководството на клубот претходно денеска потврди дека Јан Диоманде официјално е нов играч на Реал Мадрид, со што 19-годишникот стана најскапиот африкански фудбалер во историјата.
Диоманде пристигнува од РБ Лајпциг за 125 милиони евра плус 15 милиони евра бонуси и потпиша седумгодишен договор, до летото 2033 година.
Крилниот напаѓач пристигнува како фудбалер за кого Реал плати највисока фиксна компензација во историјата на клубот. Вкупниот рекорд, ако се вклучат бонусите, му припаѓа на Џуд Белингам.
Англичанецот пристигна од Борусија Дортмунд за 127 милиони евра, но тоа ги вклучува и бонусите. Белингам дојде за фиксни 103 милиони евра, 22 помалку од Диоманде, плус до 30,9 милиони евра бонуси поврзани со перформансите. Ако Диоманде ги исполни условите, што е реално да се очекува, тој ќе стане најскапиот играч на Реал во историјата.
Диоманде пристигна во РБ Лајпциг од шпанскиот Леганес и го покажа својот потенцијал во својата прва сезона. Како брзоног крилен играч, тој постигна 12 гола и имаше девет асистенции во 33 лигашки натпревари. Тој исто така ги започна сите четири натпревари на Брегот на Слоновата Коска на Светското првенство оваа година.
Диоманде е петтото засилување на Реал за новата сезона, по Марко Кукурела, Бернардо Силва, Ибрахима Конате и Дензел Дамфрис.
Реал минатата сезона не освои ниту еден трофеј, па затоа влегуваат во новата сезона многу амбициозно со харизматичниот Португалец Хозе Мурињо на купата, кој беше тренер на „кралевите“ од 2010 до 2013 година.
