Насилните протести што ја зафатија Франција за време на викендот се проширија и во Италија, каде што втора ноќ по ред во Милано избувнаа судири меѓу демонстрантите и полицијата.

Демонстрантите кршеле излози, ограбувале продавници и уништувале имот, додека полицијата одговори со солзавец и водни топови.

Италијанската премиерка Џорџија Мелони поради немирите за денеска свика итен состанок за безбедност.

Немирите во Милано започнаа во саботата, за време на протестот против високите трошоци за живот, и продолжија во неделата.

Маскирани демонстранти фрлале предмети кон полициски возила, превртувале канти за ѓубре и оштетувале велосипеди и скутери. Супермаркет во близина на познатата катедрала во Милано бил ограбен. Слични инциденти биле пријавени во Болоња и Торино,

Градоначалникот на Милано, Џузепе Сала, рече дека бил сведок на скршени излози, ограбени продавници и преплашени граѓани.

„Многу сум загрижен бидејќи ова е нов феномен што произлегува и од меѓународните околности и затоа дополнително се поттикнува“, рече Сала.

Премиерката Мелони го осуди насилството и ги нарече демонстрантите насилници кои ги искористуваат протестите за да шират хаос и да ја нападнат полицијата.

„Протестирањето е право. Уништувањето на нашите градови не е“, рече таа на социјалната мрежа X.

Италијанскиот вицепремиер Матео Салвини ги опиша настаните како „урбана војна“.

Во Франција, пак, речиси 2.400 луѓе биле уапсени во текот на викендот, додека околу 1.000 полицајци и жандармериски службеници биле повредени во судирите, од кои седуммина сериозно.