Граничниот премин Рафах во Газа отворeн по две години

Граничниот премин Рафах помеѓу Појасот Газа и Египет е повторно отворен во „пилот-операција“ по речиси две години затворање, објавија израелските медиуми во недела наутро.

„Преминот Рафах е повторно отворен во пилот-операција“, објави весникот „Једиот Ахронот“.

„Според проценките, движењето на луѓе во двата правци ќе започне во понеделник, при што се очекува околу 150 луѓе да го напуштат Појасот Газа дневно, додека околу 50 да се вратат“, објави весникот.

Според весникот, на Палестинците кои избегале од Газа за време на израелската војна ќе им биде дозволено да се вратат во енклавата исклучиво преку овој терминал.

Додадено е дека Израел ќе го следи преминот од далечина, користејќи опрема за надзор, наместо директно присуство на израелски војници.

Весникот, исто така, објави дека Египет ќе му обезбеди на Израел дневен список на луѓе кои ќе ја преминат границата во двата правци во следните 24 часа.

Израел, исто така, ќе дозволи мал број ранети палестински борци да ја напуштат Газа преку преминот доколку сакаат, според весникот, и дека, во принцип, на сите оние кои ќе заминат ќе им биде дозволено да се вратат.

Според египетската државна телевизија Ал-Кахера њуз, Каиро ќе започне со префрлање на палестински пациенти од Појасот Газа за лекување во египетските болници преку преминот Рафах во понеделник.

Голем број амбулантни возила се распоредени на египетската страна од преминот како подготовка за прием на пациенти од Газа, додека болниците низ Египет ги засилија своите мерки за подготвеност, се додава во извештајот.

Египетските болници се во зголемена готовност за прием на палестински пациенти, соопшти каналот.

Трансферот на пациентите ќе се изврши според однапред договорен механизам, а палестинската страна од преминот Рафах официјално ќе биде ставена во функција во понеделник.

Египетското Министерство за здравство испрати медицински материјали и опрема за извршување на потребните прегледи на пациентите кои пристигнуваат од Газа, се вели во извештајот.

Додадено е дека египетската страна од преминот Рафа е отворена 24 часа на ден и е целосно оперативна за да се олесни трансферот.

Нема официјални изјави од израелските, египетските или палестинските власти во врска со овие тврдења.

Како клучен пат за испорака на хуманитарна помош, Израел го зазеде преминот Рафах во мај 2024 година, речиси девет месеци по почетокот на војната во Појасот Газа, во која загинаа повеќе од 71.000 луѓе, а повеќе од 171.000 беа повредени од октомври 2023 година.

Преминот требаше повторно да се отвори во октомври како дел од првата фаза од договорот за прекин на огнот, но Израел одби да го стори тоа сè додека не се ослободи последниот затвореник во Газа, што се случи оваа недела.

И покрај прекинот на огнот, Израел продолжи со нападите, убивајќи 524 луѓе и ранувајќи 1.360 од 10 октомври, според Канцеларијата за медиуми во Газа.