Американскиот претседател Доналд Трамп изјави дека иранските власти испратиле покана до Соединетите Американски Држави за преговори, додека тој размислува, како што изјави, за „многу силна“ воена акција против иранскиот режим поради неговите смртоносни мерки против демонстрантите.
„Тие се јавија вчера. Иран се јави на преговори. Лидерите на Иран сакаат да преговараат. Мислам дека се уморни од американските напади. Иран сака да преговара со нас“, рече Трамп синоќа, објави денес Си-Ен-Ен.
Трамп истакнал дека неговата администрација ги следи смртоносните протести во Иран и продолжува да ја разгледува можноста за воена интервенција.
„Се чини дека се убиени некои луѓе кои не требало да бидат убиени. Иранските власти се насилни. Не знам дали иранските лидери едноставно владеат преку насилство, но ние го разгледуваме тоа многу сериозно. Американската војска го разгледува тоа и ние разгледуваме некои многу силни опции“, рече Трамп во разговор со новинарите во претседателскиот авион.
Кога беше прашан дали Иран ја преминал „црвената линија“ што Трамп претходно ја поставил кога станува збор за убивање демонстранти, тој рече дека „изгледа како да почнуваат“.
На прашањето како би реагирале САД доколку Иран ги нападне американските воени бази, Трамп одговори: „Ќе ги нападнеме како никогаш досега“.
Трамп, исто така, потврди дека неговата администрација би можела да разговара со Илон Маск за давање пристап на Иранците до Старлинк, сателитската интернет услуга на Маск, бидејќи интернет-врските се прекинати во Иран веќе неколку дена.
Коментарите на Трамп дојдоа неколку дена откако американскиот претседател им рече на новинарите дека Америка ќе интервенира ако Техеран продолжи да користи смртоносно насилство врз демонстрантите.
Си-Ен-Ен објави во неделата дека Трамп разгледува различни опции за интервенција, од воени напади до нови санкции против клучните личности во иранскиот режим.
Си-Ен-Ен претходно објави дека во американската администрација постои загриженост дека воените напади би можеле да ги поткопаат протестите во Иран, потврдувајќи дека Трамп разгледува низа потенцијални воени опции во Иран и дека бил информиран за различни планови за интервенција во последните денови.
