Египетскиот план за обнова на Појасот Газа беше усвоен денеска на вонредниот арапски самит во Каиро.

Во заедничката изјава на крајот на самитот се наведува дека планот предложен од Египет во целосна координација со Палестина и арапските земји, врз основа на анализите спроведени од Светската банка и Фондот за развој на Обединетите нации во врска со рано обновување и обнова на Газа, е усвоен како сеопфатен арапски план.

Самитот го потврди отфрлањето на раселувањето на Палестинците од нивната земја под кој било изговор или околност.

Арапскиот самит дополнително нагласи дека назначил правен комитет за проучување на класификацијата на раселувањето на Палестинците како дел од злосторството геноцид.

Се осудува неодамнешната одлука на Израел да го спречи влегувањето на хуманитарната помош во Газа и да ги затвори премините што се користат за испорака на помош, потврдувајќи дека овие мерки претставуваат кршење на договорот за прекин на огнот, меѓународното право и меѓународното хуманитарно право.

Исто така, се истакнува отфрлањето на израелската употреба на опсада и изгладување на цивили како средство за постигнување политички цели.

Генералниот секретар на Арапската лига Ахмед Абул Геит рече дека во заедничката изјава од самитот во Каиро се предлага распоредување на меѓународни мировни сили во Газа и на Западниот Брег.

„Заедничката изјава на арапскиот самит во Каиро предупреди дека секој обид за раселување на Палестинците и анексија на нивната земја ќе го дестабилизира регионот“, рече тој.

На самитот беше истакнат и итниот приоритет на спроведувањето на втората и третата фаза од договорот за прекин на огнот во Газа.

Шефот на Арапската лига понатаму рече дека специјален комитет е задолжен за континуиран ангажман со светските метрополи за да го претстави арапскиот план за обнова на Газа и чека меѓународен одговор.

Арапскиот самит, во заедничка изјава, исто така, ги осуди израелските напади и упади во Сирија и ги повика меѓународните актери да преземат итни мерки за да го принудат Израел да се повлече.