Пратениците во Европскиот парламент денеска ја поддржаа брзата имплементација на Законот за дигитални услуги и забраната за штетни практики на зависност за заштита на малолетниците, вклучително и забрана за социјални мрежи за помлади од13 години.

Членовите на Комитетот на ЕП за внатрешен пазар и заштита на потрошувачите усвоија извештај со 32 гласа „за“, пет „против“ и девет „воздржани“, изразувајќи загриженост за неуспехот на главните онлајн платформи соодветно да ги заштитат малолетниците и предупредувајќи за ризиците поврзани со зависноста, менталното здравје и изложеноста на нелегална и штетна содржина.

Како што е објавено, пратениците предложија минимална возраст од 16 години за пристап до социјалните мрежи, платформите за споделување видеа и придружниците на вештачката интелигенција (ВИ), освен ако родителите не одобрат, како и минимална возраст од 13 години за пристап до која било социјална мрежа.

Пратениците во ЕП ќе гласаат за ова барање на седницата која ќе се одржува од 24 до 27 ноември.