Москва е домаќин на самит на земјите извознички на гас. Дванаесет земји контролираат дури 70% од светските резерви на природен гас.

Рускиот претседател Владимир Путин изјави дека обидите за исклучување на Русија од светскиот пазар на гас имаат последици и дека Европа со санкциите ѝ штети на сопствената економија.

„Сите обиди за исклучување на Русија водат до зголемување на трошоците. Тие ќе станат неподносливо високи за странските купувачи. Сведоци сме на ова во Европа, која самата по себе нанесува удар на својата индустрија и општествениот сектор. Тие ги раскинаа долгорочните договори со Русија. Имаме една изрека - кој копа јама под другите, самиот паѓа во неа. Ова им се случи на земјите од Европската Унија“, истакна Путин.

Рускиот министер за надворешни работи, Сергеј Лавров, пак, во вторникот изјави дека договорот за дизел гориво меѓу Русија и САД претставува „чисто деловен аранжман“ без никакви политички или безбедносни услови.

Говорејќи на средба со главните уредници на африкански медиуми во Москва, Лавров го опиша овој аранжман како „прагматичен пристап“ на лидери кои се грижат за економиите на своите земји, како и за глобалната економија.

Тој нагласи дека интересите на граѓаните се ставени пред геополитичките цели.

„Немаше никакви услови- од типот ’ќе купиме дизел гориво од вас, под услов да преземете одредени чекори на политички или безбедносен план, било во Ормускиот теснец или каде било на друго место‘- такви поврзувања воопшто немаше“, рече Лавров.