Иран се согласи со поголемиот дел од нацртот на потенцијалниот договор со Соединетите Американски Држави, изјави денес портпаролот на иранското Министерство за надворешни работи, Есмаил Багеј и нагласи дека Иран нема да прави компромис кога станува збор за нивните „црвени линии“.

Багеј нагласи дека Иран сè уште не донел конечна одлука за договорот, додавајќи дека поголемиот дел од текстот е завршен, иако САД „постојано ја менуваат својата позиција“, пренесува Ал Џезира.

Тој рече дека Катар и Пакистан активно учествуваат во медијациските напори, но дека неодамнешните дејствија на САД, имено нападите врз Иран, влијаеле на дипломатскиот процес.

Тој истакна дека ситуацијата во врска со Ормускиот Теснец станува сè помалку безбедна поради американските дејствија.

Претходно денес, американскиот претседател Доналд Трамп прво најави жесток удар врз Иран, но потоа објави дека ги откажува планираните ракетни напади што требаше да се случат вечерва, откако, како што рече, врвни ирански претставници се вмешале и ги одобриле преговорите со САД.

Тој им рече на новинарите во Белата куќа дека очекува договорот со Иран да биде потпишан во наредните денови, нагласувајќи дека „документите се блиску до нивната конечна форма“.

Според него, Ормускиот Теснец ќе биде отворен штом ќе биде потпишан договорот.

Трамп рече дека станува збор за „меморандум за разбирање“, опишувајќи го како многу „силен“ и „детален“.

Како што рече, иранските преговарачи го одобрија нацрт-договорот, и изрази надеж дека врховниот лидер ајатолахот Моџтаба Хамнеи ќе го стори истото.