Главниот обвинител на ОАЕ, Хамад Саиф Ал Шамси, нареди формирање тим од специјализирани јавни обвинители за истрага на инцидентот со летот на „Флајдубаи“ што патуваше од Дубаи до Тел Авив на 30 септември.
Тимот ќе го истражи инцидентот со летот ФЗ1073 на „Флајдубаи“, кој патувал од меѓународниот аеродром во Дубаи до Тел Авив пред да биде пренасочен и безбедно слетан во Табук, Саудиска Арабија.
Ал Шамси му наложил на тимот да собере информации и докази и да ги утврди фактите, околностите и мотивациите околу инцидентот, вклучително и да утврди дали бил поврзан со каква било терористичка активност или цел или вклучувал претходно планирање или насочување.
Судските власти на ОАЕ имаат надлежност да го истражат инцидентот според важечкото законодавство, бидејќи авионот е регистриран во ОАЕ и лета под нивното знаме.
Според тоа, законот на ОАЕ се применува за кривични дела извршени во авионот, дури и кога тие се случуваат надвор од територијата на земјата, се додава во соопштението.
Во среда, авионот ФЗ1073, кој превезуваше 174 патници од Дубаи до Тел Авив, изврши итно слетување на Меѓународниот аеродром „Принц Султан бин Абдулазиз“ во северозападниот саудиски град Табук, откако беше пријавена расправија во пилотската кабина.
„Флајдубаи“ соопшти дека „се случила расправија во пилотската кабина“, додавајќи дека членовите на екипажот во авионот го обезбедиле авионот и безбедно го пренасочиле кон Саудиска Арабија.
Официјални лица на аеродромот изјавија дека и капетанот и првиот офицер се повредени и однесени во болница по инцидентот. Сите патници и членови на екипажот е пријавено дека се безбедни.
Националниот центар за безбедност во сообраќајот на Саудиска Арабија подоцна соопшти дека нивниот тим за безбедносна истрага започнал да работи на инцидентот и дека се координира со надлежните органи за да ги утврди околностите, да ги испита аспектите на безбедноста во воздухопловството и да собере поврзани информации и докази.
Аеродромот соопшти дека патниците подоцна го напуштиле Табук со алтернативен авион обезбеден од „Флајдубаи“.
