Франција и Шпанија денес повторно побараа ограничување на употребата на правото на вето во Советот за безбедност на Обединетите нации, истакнувајќи дека механизмот повеќепати го блокирал меѓународното дејствување во ситуации на хуманитарни кризи, како што е онаа во Газа.

Францускиот министер за надворешни работи Жан-Ноел Баро изјави дека Советот мора да се реформира за да ги одрази денешните геополитички реалности и да ја врати легитимноста на неговите одлуки.

„Сакаме да се осигуриме дека две места во Совет за безбедност ќе ѝ бидат дадени на Африка, дека Јапонија, Германија и Бразил, исто така, можат да имаат место за да се носат полегитимни одлуки“, рече тој на Парискиот мировен форум.

Тој додаде дека Франција соработува со Мексико веќе неколку години за промовирање иницијатива што би го ограничила правото на вето во случаи на злосторства и масовни страдања, предлог што досега го поддржуваат повеќе од 20 земји.

„Не успеавме да постигнеме заедничка одлука за Газа“, рече Баро, нагласувајќи дека Советот за безбедност мора да преземе морална и политичка одговорност за почитување на меѓународното право.

„Затоа толку силно повикуваме на реформа на Советот за безбедност – за да се деблокираат одлуките што се спречени со вето кога се прекршуваат основните човекови права“, додаде тој.

Шпанскиот министер за надворешни работи Хозе Мануел Албарес се согласи со изјавите на Баро, истакнувајќи дека ставот на Шпанија е конзистентен „без разлика дали станува збор за Украина, Газа, Судан или Сахел“.

„Го браниме меѓународното право, меѓународното хуманитарно право и заштитата на цивилите“, изјави Албарес.

Тој ја опиша Агенцијата за бегалци на ОН (УНРА) како „незаменлива институција“, додавајќи дека „животите на шест милиони Палестинци на Блискиот Исток зависат од неа“.

Албарес нагласи дека хуманитарната помош мора непречено да стигне до Појасот Газа, а одговорните за нападите врз хуманитарни работници мора да бидат изведени пред лицето на правдата.

„Мора да потсетиме дека одлуките на Меѓународниот суд на правдата се обврзувачки за сите земји членки на Обединетите нации, вклучително и за Израел“, рече Албарес.

„Израел не може да има право на вето“, додаде тој.

Во меѓувреме, претседателката на Меѓународниот комитет на Црвениот крст (МКЦК), Мирјана Спољарич-Егер, предупреди дека хуманитарната операција во Газа останува исклучително сложена, чувствителна и опасна.

„Прекинот на огнот мора да се одржи бидејќи милиони животи се на раб на пропаст“, рече таа, додавајќи дека доколку продолжат борбите, „луѓето во Газа немаат веќе никаква отпорност.“

Спољарич-Егер предупреди дека игнорирањето на меѓународното право во Газа и Судан праќа „опасен сигнал до повеќе од 450 вооружени групи и недржавни актери дека сè е дозволено“, посочувајќи дека нивната моќ дополнително се зголемува со новите технологии.