Турскиот министер за надворешни работи, Хакан Фидан, и неговиот ирански колега, Абас Арагчи, разговарале телефонски за безбедносната ситуација во регионот, соопштија турски дипломатски извори.

Во четвртокот, двајцата разговарале за тековните преговори меѓу Техеран и Вашингтон, во момент кога војната во која е вклучен Иран влегува во осмиот месец.

Според изворите, тие исто така размениле мислења и за други случувања во регионот.

Турција-Катар

Фидан, исто така, се сретнал во Анкара со заменик-премиерот на Катар и државен министер за одбрана, шеикот Сауд бин Абдулрахман Ал Тани, наведуваат турски дипломатски извори.

Одделно, турскиот министер за национална одбрана, Јашар Ѓулер, и неговиот катарски колега, по билатералната средба, претседавале со разговори меѓу делегациите на двете земји.

Ѓулер го пречекал Ал Тани, кој престојува во посета на Туркије на покана од Анкара, во седиштето на Министерството за национална одбрана.

На средбите присуствувал и началникот на Генералштабот, Селчук Бајрактароглу.

Телефонски разговор на Арагчи со неговиот колега од Оман

Во меѓувреме, Арагчи остварил и одделни телефонски разговори со неколку колеги од регионот, дискутирајќи за случувањата и дипломатските напори за промовирање на мирот и стабилноста на Блискиот Исток, се наведува во официјалните соопштенија.

Разговорите се одвиваат во услови на ескалација на тензиите поради поморската блокада од страна на САД и прашањата за безбедноста на пловидбата во Ормускиот Теснец, додека Катар продолжува да посредува меѓу Вашингтон и Техеран.

Иранската влада преку објава на платформата X соопшти дека Арагчи и неговиот колега од Оман, Бадр Албусаиди, разговарале за „најновите регионални случувања и дипломатските напори за постигнување мир и стабилност во регионот“.

Новинската агенција на Оман исто така пренесе дека Арагчи и Албусаиди ја истакнале потребата да се направи чекор подалеку од самата деескалација, кон постигнување трајни договори засновани на практични решенија.

Тие истакнале дека таквите мерки треба да ја гарантираат безбедноста на поморските патишта, да стават крај на војната и да спречат повторно избувнување на непријателствата во регионот.

Ормускиот Теснец, кој се наоѓа меѓу Иран и Оман, претставува еден од стратешки најважните пловни патишта во светот, преку кој се транспортираат големи количества нафта и гас од земјите од Заливот кон меѓународните пазари.

Иран-Катар-Саудиска Арабија

Според иранското Министерство за надворешни работи, подоцна во четвртокот, Арагчи остварил посебни телефонски разговори со саудискиот министер за надворешни работи, принцот Фајсал бин Фархан, како и со катарскиот премиер и министер за надворешни работи, шеикот Мохамед бин Абдулрахман Ал Тани.

Од Министерството преку Телеграм соопштија дека разговорите биле фокусирани на случувањата во регионот и на најновите дипломатски напори насочени кон воспоставување стабилност во регионот.

Во посебно соопштение, Министерството наведе дека Арагчи разговарал и со јорданскиот заменик-премиер и министер за надворешни работи, Ајман Сафади.

За време на разговорот, Арагчи изразил сочувство по повод смртта на мајката на Сафади, а двајцата министри размениле мислења за неодамнешните случувања во регионот.

Пораката на Хамнеи до Путин

Како што пренесе иранскиот државен сервис ИРИБ, секретарот на Врховниот совет за национална безбедност на Иран, Мохсен Резаеи, за време на средба во Москва му пренел порака од Врховниот лидер Моџтаба Хамнеи до рускиот претседател Владимир Путин.

Резаеи, кој истовремено е и претставник на Врховниот лидер, се сретнал со Путин во Кремљ.

Содржината на пораката не е обелоденета. Претходно, Путин го прими Резаеи во Кремљ.

„Владимир Путин го прими Мохсен Резаеи, секретар на Врховниот совет за национална безбедност на Иран, кој моментално престојува во Москва“, се наведува во соопштението од Кремљ.

Оман-Пакистан

Одделно, според соопштението на пакистанското Министерство за надворешни работи, Албусаиди и пакистанскиот министер за надворешни работи, Исхак Дар, во телефонски разговор дискутирале за неодамнешните регионални и меѓународни случувања.

Тие ја истакнале важноста од континуиран дијалог и дипломатски ангажман за унапредување на мирот и стабилноста во регионот, се вели во соопштението.

Во понеделникот, Иран соопшти дека сè уште разменува пораки со САД преку посредници и дека повторното отворање на пловниот пат зависи од тоа дали Вашингтон ќе ја прекине блокадата.

На 28 февруари, САД и Израел извршија напади врз Иран, што го поттикна Техеран да возврати против Израел и американските капацитети во регионот, сè додека во април не беше постигнат прекин на огнот.

На 18 јуни, Вашингтон и Техеран потпишаа меморандум за разбирање во врска со слободата на пловидба во Ормускиот теснец, но неговата имплементација запре поради несогласувања околу безбедносните аранжмани.