Претседателот на Соединетите Американски Држави, Доналд Трамп, денес изјави дека му дава на Хамас „три до четири дена“ да одговори на мировниот план за Газа што го презентираше претходниот ден заедно со израелскиот премиер Бенјамин Нетанјаху.

„Нема многу простор за преговори за предлогот. Ќе работиме околу три или четири дена. Ќе видиме како ќе оди. Сите арапски земји потпишаа. Сите муслимански земји потпишаа. Израел потпиша“, рече Трамп додека ја напушташе Белата куќа пред состанокот со високи воени претставници во воената база Квантико во Вирџинија.

Трамп рече дека ако Хамас не се согласи со договорот, тоа ќе биде „многу тажен крај“.

„Само го чекаме Хамас, а Хамас или ќе го стори тоа или нема, а ако не го стори, тоа ќе биде многу тажен крај“, рече американскиот лидер.

Палестинската група Хамас вети дека „одговорно“ ќе го проучува планот на американскиот претседател Доналд Трамп за Газа, соопшти Катар во вторник.

„Хамас го доби планот на Трамп доцна синоќа и вети дека ќе го проучува одговорно“, изјави портпаролот на Министерството за надворешни работи, Маџед Ал Ансари, на брифинг за медиумите во Доха.

Тој рече дека ќе се одржат билатерални средби со преговарачкиот тим на Хамас и со учество на турски и египетски делегации.