Врховниот лидер на Иран издаде директива дека ураниумот од земјата, кој е речиси соодветен за оружје, не треба да се испраќа во странство, изјавија двајца високи ирански извори, со што се зацврсти ставот на Техеран во врска со едно од главните барања на САД на мировните преговори.

Наредбата на Моџтаба Хамнеи би можела дополнително да го фрустрира американскиот претседател Доналд Трамп и да ги комплицира разговорите за прекин на американско-израелската војна против Иран.

Според Ројтерс, израелските власти велат дека Трамп го уверил Израел дека ова прашање ќе биде разгледано.

Иранските власти тврдат дека изнесување на материјалот би ја направил земјата поранлива на идни напади и инсистираат дека залихите мора да останат во Иран.

Ниту Белата куќа, ниту иранското министерство за надворешни работи не коментираа.

Иран има залихи од повеќе од 400 килограми високо збогатен ураниум, за кој израелските власти велат дека е доволен за 11 нуклеарни бомби доколку се збогати дополнително.

Порано овој месец, висок израелски воен функционер изјави дека доколку ураниумот не се отстрани, војната започната во февруари може да се смета за „еден голем неуспех“.

Потпретседателот на САД, Џ.Д. Венс, претходно изјави дека планот на САД во овој момент не е Русија да го земе збогатениот ураниум од Иран.