Израелската војска спречила цистерна со вода да стигне до домовите на Палестинците кои веќе една недела се под опсада во местото Кусра на окупираниот Западен Брег, соопштија локални извори.

Според информациите на дописникот на агенцијата Анадолу од тоа подрачје, УНИЦЕФ од 9 август успеал да достави храна и медицински материјали до жителите на Кусра, но израелските сили не дозволиле да помине цистерната која требало да достави вода до опколените домови.

Претседателот на Советот на Кусра, Абдулазим Вади, за палестинската официјална новинска агенција ВАФА изјави дека сè уште не вродиле со плод обидите да се обезбедат вода и електрична енергија за трите домови во кои се наоѓаат палестински семејства под опсада.

Палестински и странски активисти, исто така, се обиделе да им достават вода и храна на семејствата, но израелската војска ги спречила во тоа.

Израелските сили продолжуваат да го ограничуваат влезот во подрачјето кое го прогласиле за затворена воена зона.

Палестинците наведуваат дека израелски доселеници од 9 август под опсада држат три палестински семејства во Кусра, блокирајќи ги патиштата до нивните домови и оневозможувајќи им на членовите на семејствата да влегуваат и излегуваат.

Постои стравување дека семејствата би можеле да бидат принудени да ги напуштат своите домови и дека нивниот имот би можел да биде одземен.