Сојузот на синдикатите на Македонија (ССМ) денеска во Скопје организираше протест со барање за зголемување на минималната плата на 600 евра и линеарно зголемување од 100 евра за сите други плати.

Демонстрантите се собраа пред зградата на ССМ, од каде продолжија кон Собранието, Стопанската комора и Владата барајќи пратениците брзо да одобрат законски измени што би гарантирале подостоинствен живот за работниците.

„Денеска сме тука за нашите деца, за нашите ќерки и синови, за нашите внуци и правнуци. Денеска сме тука да се бориме мизерните плати да се зголемат затоа што Владата и газдите одбиваат да го сторат тоа и одбиваат да им помогнат на нашите семејства. Денеска работниците зборуваат. Политичарите имаа доволно време да го сторат тоа и не го направија. Од денеска ние зборуваме за зголемување на минималната плата на најмалку 600 евра и за зголемување на сите останати плати за најмалку 6.000 денари, рече претседател на ССМ, Слободан Трендафилов.

Во својот говор, Трендафилов најави продолжување на протестите доколку нивните барања не бидат исполнети.

„Бараме итно да се донесат измени на Законот за плати. Ако до крајот на неделата не се изгласаат измените ќе блокираме улици, институции и генерален штрајк. Ако не се случи тоа ќе собереме 10 илјади потписи и ќе станеме предлагач и ќе бараме намалување на функционерските плати за 80 отсто и зголемување на работничките плати за 100 евра и минималната на 600 евра“, рече Трендафилов.

„Масовната присутност на протестот го побива фактот дека само на малкумина им требало заголемување на платите. Масовноста покажува дека народот е со синдикатот“, ијави тој.

Тој порача дека синдикатот и граѓаните веќе нема да молчат туку ќе се борат за зголемување на платите и подобрување на животниот стандард.