Германската полиција уапси повеќе од 200 лица во саботата вечерта, откако во неколку градови избувнаа насилни судири по претежно мирните демонстрации на „генерацијата Z“, на кои беше побарано подобро финансирање на образованието и социјалните политики.

Немирите избувнаа во Хамбург, Франкфурт и Берлин, откако радикални групи организираа помали демонстрации, поставувајќи барикади и судирајќи се со полицијата.

Главните протести во текот на денот, организирани од иницијативата на генерацијата Z „Регелт“ во повеќе од 30 градови, собраа десетици илјади млади луѓе, кои побараа зголемување на средствата за образование, олеснување на последиците од растечките трошоци за живот и се спротивставија на плановите за повторно воведување на задолжителната воена служба.

По стемнувањето, радикални групи организираа помали демонстрации во други делови од градовите, поставувајќи барикади, додека ситуацијата се влошуваше откако полицијата започна да интервенира за да ги растера.

Некои активисти фрлаа камења, шишиња и петарди кон полицајците, кои на неколку локации возвратија со водени топови и специјални полициски единици.

Во Франкфурт, маскирани групи, кои не биле дел од главните демонстрации на „генерацијата З“, кршеле излози и ограбувале продавници и деловни објекти, меѓу кои и продавница за оружје.

Полицијата соопшти дека групите ги искршиле излозите на продавницата и украле најмалку две парчиња огнено оружје пред да интервенираат полициските службеници.

Според полицијата, еден осомничен е уапсен, а украденото оружје е пронајдено.

Оштетено е и полициско возило, со искршени прозорци и дупнати гуми.

Властите пријавија повеќе од 30 приведувања и голема материјална штета, додека немирите продолжиле до раните утрински часови во неделата.

Во Хамбург, насилството избувнало откако главните демонстрации завршиле околу 17 часот по локално време во саботата, соопшти полицијата.

Властите привеле 120 лица откако демонстранти облечени во црно, делумно маскирани, поставиле запалени барикади во близина на главната автобуска станица.

Групите фрлале камења, шишиња и пиротехнички средства кон полицајците, при што биле повредени 11 лица, според полицијата.

Помали пожари и немири продолжиле во текот на ноќта во источните делови на градот.

56 лица приведени за време на судирите во Берлин

Полицијата во Берлин привремено привела 56 лица за време на вечерните демонстрации во населбата Мите, кои биле одвоени од претходниот мирен собир кај Бранденбуршката порта.

Полицијата соопшти дека 27 полицајци се здобиле со полесни повреди откако демонстрантите фрлале камења, шишиња, јајца и петарди кон нив.

Демонстрантите блокирале трамвај, поради што властите ја запреле поворката пред таа да стигне до планираната дестинација.

Во Келн, полицијата привела најмалку пет лица откако помали групи се судриле со полициските службеници во близина на градската катедрала, фрлајќи шишиња и пиротехнички средства.

Началникот на полицијата во Келн, Јоханес Херманс, го осуди насилството, наведувајќи дека екстремистите ги нарушиле мирните демонстрации.

„Жално е што меѓу младите луѓе, кои сакаа мирно да протестираат за својата иднина, се инфилтрираа екстремисти на кои единствена цел им беше насилството“, изјави Херманс.

Тој им се заблагодари на учесниците кои останале смирени и се оградиле од насилството.

До раните утрински часови во неделата, ситуацијата главно се смирила во сите погодени градови, додека полицијата продолжила со истрагата за инцидентите и проценката на причинетата материјална штета.