Франција свикува итен состанок на Г7 за Блискиот Исток

Франција следната недела ќе организира заеднички состанок на министрите за финансии, министрите за енергетика и претставниците на централните банки на земјите од Г7, со цел да се разговара за актуелната состојба на Блискиот Исток, изјави министерот за економија Роланд Лескур.

Во изјава за радио „РТЛ“, Лескур појасни дека состанокот ќе се одржи в понеделник и ќе биде фокусиран на процена на случувањата во регионот, како и на нивните потенцијални економски и енергетски влијанија.

„В понеделник заедно ќе се сретнеме со министрите за економија, министрите за енергетика и претставниците на централните банки за да дискутираме за ситуацијата и да разбереме што точно се случува“, истакна тој.

Овој состанок доаѓа во време на зголемени тензии на Блискиот Исток кои предизвикаа сериозна загриженост на глобалните енергетски пазари, како и за економската стабилност.

Франција, која од јануари претседава со Групата седум (Г7), ја координира оваа иницијатива како дел од пошироките напори за справување со глобалните економски предизвици. Групата Г7 ја сочинуваат седумте најразвиени економии: Германија, Канада, САД, Франција, Италија, Јапонија и Велика Британија. Исто така, Франција треба да биде домаќин на самитот на Г7 во градот Евијан во средината на јуни.

САД и Израел ја продолжуваат заедничката офанзива врз Иран започната на 28 февруари, при што досега се убиени над 1.300 луѓе, меѓу кои и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив во кои има американски воени бази, предизвикувајќи жртви и штета на инфраструктурата, а воедно ги наруши глобалните пазари и авиосообраќајот.