Имаме обврска да градиме општество во коешто трудот се цени и вреднува, а социјално-економските права се остваруваат. Да се однесуваме кон работниците како кон вреден социјален капитал, ако сакаме да ги задржиме тука, или да ги вратиме дома, порача македонската претседателка Гордана Сиљановска Давкова во пораката упатена по повод 1 Мај, Меѓународниот ден на трудот.

Први мај како што истакнува претседателката не потсетува на долгата, тешка, праведна и достоинствена борба на работниците за признавање на трудот како извор и творец на вредности. Од одговорите на повеќе прашања, вели таа, зависи уживањето на економските и социјални правa од страна на работниците.

„Одбележувањето на Денот на трудот во над 160 држави е вистински момент за соочување со сè уште актуелните прашања: Дали социјалната правда е идеал или реалност?; дали работничкиот труд е соодветно вреднуван, односно дали работниците се правично наградени за работата и можат да напредуваат согласно знаењето и вложениот труд?; дали се безбедни и сигурни на работното место?; дали и зошто има случаи на присилна работа?; дали секому, под еднакви услови му е достапно секое работно место?; дали секој вработен има право на платен дневен и неделен и годишен одмор?”, порачува Сиљановска Давкова.

Таа посочува дека синдикалното организирање, правото на протест и социјалниот дијалог се предуслови за рамнотежа меѓу економските интереси и социјалната правда.