Двајца војници се ранети во вооружени судири со милитанти на Хезболах во јужен Либан, информираше израелскиот јавен радиодифузен сервис КАН, повикувајќи се на армиски извори.

Израелската армија изјави дека војниците се здобиле со умерени повреди за време на вооружен судир што се случил претходно со милитантите на Хезболах во јужен Либан.

„Силите од бригадата Голани, дел од 36-та дивизија, биле нападнати додека напредувале на либанска територија, при што војниците се здобиле со умерени повреди поради кои било потребно нивно префрлање во болница на лекување“, објави радиодифузерот КАН.

36-та дивизија се смета за најголема регуларна оклопна дивизија во израелските одбранбени сили.

„Силите на местото на настанот возвратија на оган, додека израелските воздухопловни сили започнаа напад врз неколку воени позиции и противтенковски пункт што му припаѓаше на Хезболах во областа“, тврдар израелски армиски извори.

Силите продолжуваат со операциите на местото на инцидентот, покрај спроведувањето операции за пребарување и обезбедување кордон.

Израелската армија речиси секојдневно објавува извештаи за ранети војници во јужен Либан.

И покрај прекинот на огнот, израелската армија продолжува да напаѓа јужен Либан, уништувајќи стотици домови под изговор дека се инфраструктура на Хезболах.

Од ескалацијата на борбите меѓу Израел и Хезболах во март, израелските операции во Либан, според извештаите, убиле речиси 2.700 луѓе, раниле над 8.000 и раселиле приближно 1,6 милиони - околу една петтина од населението.

Десетдневниот прекин на огнот што започна на 17 април подоцна беше продолжен до 17 мај, но Израел продолжува да го крши секојдневно преку воздушни напади и уривање на домови во јужен Либан.