Србија од денеска започна со оперативна имплементација на СЕПА системот, единствена зона за плаќање во евра, приклучувајќи се кон групата земји во регионот вклучени во европскиот систем на брзи и поевтини трансакции.

Црна Гора и Албанија претходно се приклучија на СЕПА системот, станувајќи членки во 2025 година, додека Северна Македонија беше вклучена на почетокот на 2026 година. Молдавија оттогаш се приклучи на системот. Босна и Херцеговина и Косово остануваат единствените балкански земји кои сè уште не се дел од СЕПА.

Генералната секретарка на Здружението на банки на Србија, Марина Пападакис, изјави дека СЕПА им овозможува на граѓаните и бизнисите да вршат поповолни, побрзи и поедноставни плаќања во евра во споредба со претходниот СВИФТ систем.

Според неа, меѓународните трансакции кои претходно траеја во просек три работни дена сега ќе бидат обработени истиот ден или најдоцна следниот ден, во зависност од времето на внесување на нарачката.

Пападакис изјави дека системот ќе донесе поголема автоматизација на деловните операции и поекономични трансакции со партнери од странство, но нагласи дека само трансакции во евра ќе се извршуваат преку СЕПА системот.

Таа додаде дека сè уште постојат одредени тешкотии во деловното работење на економијата, особено поради постојните договори кои предвидуваат различна распределба на трансакциските трошоци, и дека целосните ефекти од системот ќе бидат видливи дури по прилагодувањето на деловните практики.

За разлика од Косово, за кое се проценува дека ќе губи околу 55 милиони евра годишно поради непоклучувањето кон СЕПА системот, за Босна и Херцеговина не се објавени официјални податоци за можни економски загуби.

СЕПА е единствена зона за плаќање во евра што им овозможува на граѓаните и компаниите да вршат побрзи, поевтини и стандардизирани банкарски трансакции меѓу земјите-членки на системот. Меѓу европските земји кои сè уште не се членки, остануваат и Белорусија и Русија.