Вршителот на должноста министер за надворешни работи и дијаспора на Косово, Глаук Коњуфца, во неделата го прими министерот за Европа и надворешни работи на Албанија, Ферит Хоџа.

По средбата, Коњуфца изјави дека за Косово членството на Албанија во Европската Унија (ЕУ) би претставувало инспирација и голема можност за придонес кон стремежите на Косово за евроинтеграција.

Коњуфца рече дека со својот албански колега разговарал за низа прашања од интерес за двете земји.

„Во овие времиња на глобална нестабилност, координацијата меѓу нашите две земји е витална потреба. Мораме да ја промовираме нашата улога како фактор на стабилност во регионот. Покрај евроинтегративната ориентација на земјите во регионот, членството во НАТО на повеќето држави од нашиот регион претставува фактор на стабилност. Во таа смисла, од министерот Хоџа побарав поддршка од Албанија за нашите стремежи за побрзо приближување и членство на Косово во НАТО“, изјави Коњуфца.

Тој додаде дека за Косово поддршката од Албанија во процесот на европските интеграции е многу потребна и значајна и нагласи дека „тоа постојано се случува“.

Хоџа изјави дека секоја болка на Косово се чувствува и во Албанија, исто како што секој успех на Косово се слави и во Албанија.

Албанскиот министер рече дека независноста на Косово се претворила во успех за неговите граѓани, бидејќи Косово денес е отворено и рамноправно општество во кое нивните права се заштитени според највисоките европски стандарди.

„Ги повикувам сите, пријатели и поддржувачи на Косово, но и скептици, во и надвор од регионот, да разберат дека интеграцијата на Косово во меѓународните организации е во директен интерес на сите негови граѓани, вклучително и на малцинските заедници. Поради тоа, членството на Косово во Советот на Европа, кое сега се одложува, ќе биде позитивен развој за сите граѓани на земјата“, изјави Хоџа.

Хоџа нагласи дека со неговиот косовски колега се договориле за координација и редовни министерски состаноци меѓу двете земји.

Министерот Хоџа претходно беше примен и од вршителката на должноста претседател на Косово, Албулена Хаџиу.