Црногорскиот претседател Јаков Милатовиќ започна интензивни дипломатски активности во Берлин, каде што ќе се сретне со високи германски претставници и членови на Бундестагот за понатамошно зајакнување на меѓународната поддршка за европската перспектива на Црна Гора.

На работна вечера со државниот министер за Европа и еден од највлијателните членови на владејачката ЦДУ, Гинтер Крихбаум, фокусот беше ставен на забрзување на процесот на пристапување и зајакнување на политичката поддршка во рамките на Европската Унија.

Заеднички беше констатирано дека Црна Гора се соочува со уникатен „прозорец на можности“ кој бара решителна акција и забрзување на реформските процеси.

Особено беше нагласено дека членството во Европската Унија не е автоматски процес, туку резултат на конкретни и мерливи реформи, првенствено во областа на владеењето на правото. Зајакнувањето на независноста на судството и институциите е препознаено како клучен предуслов за понатамошен напредок и градење доверба.

Милатовиќ ја истакна целосната посветеност на Црна Гора на спроведувањето на реформите, со порака дека сега е време за конкретни чекори напред за земјата да може да го искористи поволниот политички моментум и да стане полноправна членка на Европската Унија.