Компанијата за финансиски технологии „Блок“, сопственик на апликацијата за мобилно плаќање и финансии „Каш Ап“, објави дека ќе отпушти повеќе од 4.000 вработени, бидејќи фирмата воведува автоматизација со прифаќање на вештачки интелигентен систем.

„Денес споделивме тешка одлука со нашиот тим. Го намалуваме бројот на вработени во „Блок“ за речиси половина, од над 10.000 луѓе на нешто помалку од 6.000, што значи дека од над 4.000 луѓе се бара да си заминат или влегуваат во консултации“, изјави Дорси.

„Блок“, основан од Џек Дорси - коосновачот на социјалната мрежа „Твитер“, сега позната како X - ги објави своите финансиски резултати за четвртиот квартал од минатата година.

Дорси изјави дека верува оти ова е правилниот тек на дејствување за компанијата и ги наведе причините за одлуката.

Укажувајќи на растечкото влијание на алатките за вештачка интелигенција, Дорси истакна дека тие фундаментално го менуваат тоа што значи да се изгради и води компанија.

„Веќе го гледаме тоа интерно. Значително помал тим, користејќи ги алатките што ги градиме, може да направи повеќе и подобро. А можностите на аналитичките алатки се зголемуваат побрзо секоја недела“, рече тој.

Во текот на следната година, тој очекува мнозинството компании да дојдат до истиот заклучок и да преземат слични структурни промени, односно дека Блок не „подранува“ туку дека останатите „доцнат“.

Тој додаде дека претпочита да ги прави овие прилагодувања проактивно и транспарентно, според условите на компанијата, отколку да биде принуден да дејствува како одговор на надворешни притисоци.