Ердоган: Донесени важни одлуки со кралот Абдулах за зајакнување на врските на Туркије и Јордан
Турскиот претседател исто така е одликуван со Орденот „Ал Хусеин бин Али“ за зајакнување на билатералните односи.
Туркије и Јордан ќе го зајакнат пријателството меѓу двете земји, изјави во саботата турскиот претседател Реџеп Таип Ердоган за време на средбата со кралот Абдулах во Истанбул, кој пристигна во официјална посета.
Ердоган го пречека јорданскиот монарх во палатата Долмабахче, каде што двајцата имаа средба тет-а-тет, по што следуваа разговори меѓу делегациите.
На состанокот присуствуваа и турскиот министер за национална одбрана Јашар Ѓулер, министерот за надворешни работи Хакан Фидан, директорот на Националната разузнавачка служба Ибрахим Калин и претседателскиот советник Акиф Чагатај Килич.
По состанокот, на Ердоган му беше врачен Орденот „Ал Хусеин бин Али“, највисокото одликување на Кралството Јордан.
Според Кралскиот хашемитски двор, Ердоган е одликуван во знак на признание за неговите напори за зајакнување на длабоките историски врски и истакнатите односи меѓу двете земји.
„На денешните состаноци со мојот драг брат, кралот Абдулах од Јордан, донесовме важни одлуки што ќе го зајакнат пријателството меѓу нашите две земји“, изјави Ердоган.
Пред заминувањето од палатата, двајцата лидери одржаа официјална вечера.