Педесет и два проценти од граѓаните имаат доверба во Европската Унија, што е најдобар резултат од 2007 година, според најновите резултати на Евробарометар објавени во среда.

Според анкетата спроведена од 26 март до 22 април оваа година во сите 27 земји-членки, 52 проценти од граѓаните имаат тенденција да ѝ веруваат на Европската Унија. 

Ова е највисокото ниво на доверба во последните 18 години. Највисоко ниво на доверба е кај младите луѓе на возраст од 15 до 24 години, од кои 59 проценти имаат тенденција да ѝ веруваат на Европската Унија.

Довербата во националните парламенти и влади е значително помала. На ниво на ЕУ, 37 проценти од испитаниците имаат тенденција да му веруваат на националниот парламент, а 36 проценти имаат тенденција да му веруваат на националната влада. 

Кога станува збор за перцепцијата за состојбата на европската економија, 44% од Европејците ја оценуваат како добра, додека 48% ја оценуваат како лоша. 

Анкетата покажа највисока поддршка досега за единствената валута, еврото, со 74 проценти во ЕУ27 и 83 проценти во еврозоната.

На ниво на ЕУ, најголем проблем е инфлацијата, како што сметаат 31 процент од граѓаните, а економската состојба (20 проценти) е на второ место.

На прашањето кои се двата најголеми предизвици со кои моментално се соочува ЕУ, руската агресија врз Украина се рангираше на прво место, со 27 проценти. Меѓународната ситуација се рангираше на второ место, со 24 проценти.

Во своите одговори на прашањата за тоа каква економска состојба очекуваат во следните 12 месеци 17 % веруваат дека ќе биде подобра, 43 дека ќе биде иста, а 33 дека ќе биде полоша.

Целосно позитивна слика за ЕУ имаат 43 проценти испитаници, а 38 отсто се неутрални по ова прашање.

Солидно мнозинство е оптимистично за иднината на ЕУ- 62 проценти од анкетираните.

Кога станува збор за приоритетите на буџетот на ЕУ, европските граѓани би сакале најмногу да се издвојуваат за одбрана и безбедност (43 проценти), вработување, социјални работи и јавно здравје (42 проценти) и образование, обука, млади, култура и медиуми (34 проценти).

Во однос на војната на Русија против Украина, 80 проценти од европските испитаници се согласуваат со тоа ЕУ да ги прифати луѓето што бегаат од војната, додека повеќе од три четвртини од Европејците (76 проценти) поддржуваат обезбедување финансиска и хуманитарна помош за Украина.

Речиси три четвртини, 72 проценти од граѓаните на ЕУ поддржуваат економски санкции против руската влада, компаниите и поединците, додека 60 проценти го одобруваат тоа ЕУ да ѝ додели статус на земја-кандидат на Украина, а 59 проценти се согласуваат со финансирањето од ЕУ за купување и снабдување со воена опрема на Украина.