Почина актерот Роберт Дувал, добитник на Оскар и две награди Еми
Во својата богата кариера, тој го освои Оскарот за најдобра машка улога во 1984 година за филмот Нежна милост, а седум пати беше номиниран за наградата на Американската филмска академија, меѓу кои за улоги во филмовите Кум и Апокалипса денес
Американскиот актер Роберт Дувал, добитник на Оскар за улогата во филмот „Нежна милост“ и добитник на две награди Еми, почина денес на 95-годишна возраст, објави неговата сопруга Лусијана Педраса Дувал во објава на Фејсбук.
Дувал, пишува „Варајати“, беше запаметен по воздржаниот, суров натурализам што ја обележа генерацијата актери меѓу кои беа Роберт Де Ниро, Дастин Хофман и Џин Хекман.
Иако никогаш не беше комерцијална ѕвезда од калибарот на Де Ниро, неговиот ненаметлив, но целосно посветен пристап кон ликовите му донесе голема почит од колегите и критичарите, објави американското списание.
Во текот на својата богата кариера, тој го освои Оскарот за најдобра машка улога во 1984 година за филмот „Нежна милост“, а вкупно седум пати беше номиниран за наградата на Американската филмска академија, за неговите улоги во филмови, вклучувајќи ги „Кум“, „Апокалипса денес“ и „Големиот Сантини“.
Исто така, оствари значајни улоги на телевизија, во мини-серијата „Осамен гулаб“ и „Скршена патека“, за која освои две награди Еми.
Дебитираше на големото платно во 1962 година како Бу Радли во филмот „Да се убие птицата подбиваачка“.
Пресвртница во својата кариера доживеа во 1972 година со улогата на Том Хаген во филмот „Кум“, што му ја донесе првата номинација за Оскар.
Тој ја повтори улогата во продолжението, „Кум 2“, а потоа се појави во филмовите „Телевизиска мрежа“ и „Апокалипса денес“, во кои како полковник Килгор ја изговори познатата реплика „Го сакам мирисот на напалм наутро“, што му донесе уште една номинација.
Седмата номинација за најпрестижната филмска награда ја доби за улогата во драмата „Судија“, во која играше судија обвинет за предизвикување фатална сообраќајна несреќа.
Дувал е роден во Сан Диего, во семејство на адмирал на американската морнарица, а студирал глума во Њујорк.
За време на својата кариера, истакнува „Варајати“, тој остави длабок белег на театарската сцена, како и во телевизиските проекти, вклучувајќи го и филмот „Сталин“ од 1992 година, за кој беше номиниран и за наградата Еми.
Една од своите последни улоги ја одигра во филмот „Бледо сино око“ во 2022 година.
Зад себе ја остави сопругата, Лусијана Педраса Дувал, со која беше во брак од 2005 година.