Американските претставници индиректно ги предупредиле иранскиот министер за надворешни работи Абас Арагчи и претседателот на иранскиот парламент Мохамед Багер Калибаф дека Израел може да се обиде да ги убие за време на преговорите со Вашингтон за завршување на војната, објави денес Њујорк тајмс, повикувајќи се на американски претставници.
Весникот наведува дека некои американски претставници веруваат дека Израел наводно планирал да убие двајца од главните преговарачи на Иран во неделите по примирјето од 8 април, со кое завршија борбите во војната меѓу САД, Израел и Иран.
Поради тие стравувања, американските претставници побараа од своите партнери во регионот да го предупредат Техеран дека Израел може да се обиде да ги ликвидира Арагчи и Галибаф.
Според весникот, кога започна војната на 28 февруари и додека Израел спроведуваше операции во кои беа убиени голем број високи ирански претставници, Аракчи и Калибаф можеле да бидат цел.
Сепак, откако беше прогласено примирје на почетокот на април и двајцата функционери биле назначени да го претставуваат Иран во преговорите за прекин на огнот, американските претставници процениле дека секој обид за нивно убиство речиси сигурно ќе доведе до пропаѓање на преговорите и ќе предизвика ескалација на конфликтот.
Според весникот, конкретната закана за Калибаф се појавила додека се враќал во Иран од Исламабад, каде на 12 април имал разговор со потпретседателот на Соединетите Американски Држави, Џ.Д. Венс.
Двајца американски претставници изјавија за Њујорк тајмс дека иранските безбедносни служби го информирале екипажот на авионот на Калибаф за разузнавачки информации оти Израел планира да го нападне авионот и дека два израелски борбени авиони влегле во иранскиот воздушен простор од Ирак.
Авионот направил итно слетување во Машхад, во североисточен Иран, а Калибаф и членовите на неговата делегација го продолжиле своето патување кон Техеран по копно.
Ројтерс објави во март, додека борбите сè уште траеле, дека пакистански функционер рекол дека Израел ги отстранил Арагчи и Калибаф од списокот за елиминација откако Пакистан побарал од Вашингтон да не ги таргетира.
Службеникот во тоа време изјави дека Исламабад ги предупредил САД дека ако еден или двајцата бидат убиени, нема да има повеќе соговорници за преговори за прекин на огнот.
„Затоа Соединетите Американски Држави го замолија Израел да се откаже“, рече пакистански функционер.
