Иран ги одложи техничките разговори со САД, кои беа закажани за денеска во Швајцарија, во знак на протест поради континуираните израелски кршења на прекинот на огнот, првенствено во јужен Либан, изјавија за агенцијата Анадолија пакистански владини извори.

Изворите велат дека главниот преговарач на Иран, Багер Калибаф, и министерот за надворешни работи, Абас Арагчи, биле целосно подготвени да патуваат во Швајцарија на директни разговори со Вашингтон, но се повлекле во последен момент по упатствата од највисокото раководство на Иран.

Не е прецизирано дали упатствата дошле директно од врховниот лидер Моџтаба Хамнеи, кој претходно изјави дека има поинаков став за договорот меѓу САД и Иран за завршување на војната.

Изворите додадоа дека не е одреден нов датум или место за разговорите.

„Пакистан е во контакт со двете страни за да се одреди нов датум за технички разговори за постигнување конечен договор“, изјави извор близок до процесот на медијација.

Потпишувањето на Меморандумот за разбирање (MoU) од Исламабад од страна на американскиот претседател Доналд Трамп и иранскиот претседател Масуд Пезешкијан го отвори патот за директни разговори меѓу Вашингтон и Техеран во Швајцарија, закажани за денеска.

Истиот извор тврди дека американскиот потпретседател Џ.Д. Венс го откажал патувањето во Швајцарија откако Исламабад му ја соопштил одлуката на Техеран на Вашингтон.

„Логистиката на овие преговори никогаш не била едноставна или предвидлива. Во овој момент, потпретседателот не патува вечерва“, изјави портпаролот на Белата куќа.

„Со нетрпение очекуваме да започнеме технички дискусии што е можно поскоро“, додаде тој.

Швајцарското Министерство за надворешни работи соопшти дека разговорите за спроведување на договорот за завршување на војната, закажани за денеска, нема да се одржат.

Меморандумот за разбирање во Исламабад им дава на службениците и експертите од двете страни следните 60 дена да изработат конечен договор, кој се фокусира конкретно на нуклеарната програма на Иран, откако Трамп рече дека Техеран не може да има нуклеарно оружје.

Пакистанскиот премиер Шехбаз Шариф изјави дека Меморандумот од Исламабад стапил на сила веднаш по неговото потпишување и дека Иран и САД ќе преземат чекори за целосно отворање на Ормутскиот теснец за меѓународен поморски сообраќај.

Шариф, исто така, го потпишал договорот во својство на медијатор.