Сцени на тотално уништување во западна Газа по израелските напади

Цели населби во западна Газа се претворени во урнатини по израелските напади, а снимките покажуваат опсежно уништување, срушени згради и улици затрупани во урнатини, јавува Анадолу.

Патиштата низ подрачјето се блокирани од урнатините, а причинета е обемна штета на инфраструктурата во израелските напади.

Недостатокот на опрема потребна за отстранување на урнатините ги спречува Палестинците да се вратат во областа и повторно да ги подигнат своите домови.

Службата за медиуми на Владата на Газа ја прогласи енклавата за „зона на еколошка и инфраструктурна катастрофа“ по две години геноцидна војна што ја водеше Израел, во која се уништени околу 90 % од цивилната инфраструктура, со околу 70 милиони тони урнатини.

Според Обединетите нации (ОН), обновата на Газа се проценува дека ќе чини околу 70 милијарди долари.

Договорот за прекин на огнот во Газа беше постигнат меѓу Израел и Хамас на почетокот на октомври, врз основа на планот презентиран од американскиот претседател Доналд Трамп. Првата фаза вклучуваше ослободување на израелските заложници во замена за палестински затвореници. Планот, исто така, предвидува обнова на Газа и воспоставување нов управувачки механизам без Хамас.

Од октомври 2023 година, во израелските напади убиени се речиси 68.000 Палестинци во Газа, повеќето од нив жени и деца, а енклавата во голема мера е непогодна за живеење.