Потпретседателот на турската Партија на правдата и развојот (АК Партија) и претседател за односи со туркиските држави, проф. д-р Куршад Зорлу, е во официјална посета на Северна Македонија. Тој ја започна посетата со средба во Амбасадата на Туркије во Скопје со амбасадорот Фатих Улусој, а потоа се сретна и со ректорите на универзитетите во Северна Македонија.

„Под водство на нашиот претседател, срцето на нашите 86 милиони граѓани е секогаш тука, заедно со вас. Никогаш не заборавајте го тоа“, рече Зорлу.

Зорлу го посети и претседателот на Турската демократска партија (ТДП) во земјата, Зулфикар Зејнула.

Бран љубов кон претседателот Ердоган на Балканот

Во рамките на своите средби во Северна Македонија, Зорлу го посети и селото Долно Количани, кое се наоѓа во близина на Скопје, каде што се сретна со сонародниците.

Во своето обраќање таму, Зорлу рече дека доживеал емотивни моменти поради топлиот пречек од жителите.

Нагласувајќи дека ги донел поздравите од претседателот на Туркије, Реџеп Таип Ердоган, Зорлу рече: „Се надеваме дека во наредниот период односите меѓу Туркије и Северна Македонија ќе се зајакнат уште повеќе, а нашата соработка ќе стане уште поцврста.“

Зорлу истакна дека најважниот елемент што ги поврзува Туркије и Северна Македонија е љубовта на граѓаните и чувството на припадност кон двете земји.

„Сакам да бидете сигурни во едно: колку што ја сакате Туркије овде, колку што се возбудувате кога гледате телевизиски канал од Туркије или кога ќе слушнете турски збор, толку и ние се возбудуваме, се трогнуваме и се надеваме кога ќе слушнеме нешто од Евлад-и Фатихан, од Македонија, од селото Количани. Се надеваме дека нашето братство ќе го градиме заедно со овие чувства, ќе го зацврстуваме и дека иднината на овие наши деца ќе го пренесе и нашето единство во иднината. Под водство на нашиот претседател, срцето на нашите 86 милиони граѓани е секогаш тука, заедно со вас. Никогаш не заборавајте го тоа“, рече тој.

За време на говорот на Зорлу, внимание привлече големиот интерес и скандирањата на жителите во поддршка на Туркије и претседателот Реџеп Таип Ердоган.

​​​​​​​За време на средбите Зорлу беше придружуван од претседателот на Парламентарната група за пријателство Туркије-Северна Македонија и пратеник на АК Партија од Бурса, Ахмет Килич, членовите на Централниот одбор за одлучување и управување (МКЈК) на АК Партија, Ахмет Билал Кијмаз и Мехмет Али Курт, како и заменик-претседателот за односи со туркиските држави во АК Партија, Темел Акјурек.