Претседателот на Европскиот совет, Антонио Коста, денеска изјави дека ЕУ мора да ги зголеми инвестициите во одбраната, безбедноста и стратешката отпорност во услови на растечки глобални предизвици.

„Достигнуваме одлучувачки момент во преговорите за нашиот следен европски буџет за 2028 до 2034 година. Геополитичката средина се промени откако го одобривме тековниот буџет во 2020 година“, рече Антонио Коста по средбата со чешкиот премиер Андреј Бабиш во Прага.

„Сега, повеќе од кога било, треба да инвестираме во одбраната и безбедноста, конкурентноста и иновациите и стратешката отпорност“.

Споменувајќи дека ова значи да бидеме „последични во врска со нашите амбиции“, тој зборуваше за модернизација на следниот буџет на блокот, така што ЕУ ќе ги исполни своите нови приоритети, а воедно ќе ги зачува клучните столбови на поддршка на земјите-членки, кохезијата и земјоделската политика.

„Од суштинско значење е да постигнеме договор до крајот на оваа година“, рече претседателот на Европскиот совет, нагласувајќи дека не можат да дозволат никаков прекин во европското финансирање на витални проекти и политики во 2028 година.

Коста, исто така, ја истакна важноста од забрзување на напорите за намалување на трошоците за енергија, „додека ги продолжуваме нашите напори за чиста транзиција и декарбонизација на технолошки неутрален начин - тоа значи, нуклеарни или обновливи извори на енергија“.

Тој рече дека поддршката на Украина, Молдавија и Западен Балкан на нивните европски патишта е исто така „инвестиција во безбедноста и просперитетот на Европа“.