Бродот со помош „Мадлим“, натоварен со витални хуманитарни материјали за Газа, пристигна во израелското пристаниште Ашдод во понеделник вечерта под воена придружба, објави дописникот на Анадолу.

Израелските сили го запленија бродот рано во понеделник, пренасочувајќи го од неговата мисија да достави критична помош до опколената енклава.

Бродот пристигна во Израел во придружба на израелски воени бродови, јави дописникот.

Израелското Министерство за надворешни работи претходно денеска соопшти дека морнарицата му наложила на бродот „Мадлин“ да го промени курсот поради неговото приближување кон она што го нарече „ограничена зона“.

Како дел од најновата мисија организирана од Коалицијата „Флотила на слободата“ за пробивање на блокадата врз Газа и доставување помош во регионот, 18-метарскиот брод „Мадлин“ исплови за Газа на 1 јуни од пристаништето Сан Џовани Ли Кути во Катанија, Сицилија, Италија.

На бродот се наоѓаат вкупно 12 лица, вклучувајќи 11 активисти и еден новинар.

Меѓу нив се шведската климатска активистка Грета Тунберг, француско-палестинската пратеничка во Европскиот парламент Рима Хасан, Јасемин Акар од Германија, Батист Андре, Паскал Мауриерас, Јанис Мхамди и Рева Вијард од Франција, Тијаго Авила од Бразил, Суајб Орду од Турција, Серхио Торибио од Шпанија, Марко ван Рен од Холандија и Омар Фајад, новинар во Ал Џезира Мубашер, исто така од Франција.

Бродот носи итно потребни залихи за луѓето од Газа, вклучувајќи формула за бебиња, брашно, ориз, пелени, женски санитарни производи, комплети за десалинизација на вода, медицински потрошен материјал, патерици и детски протези, велат организаторите.