Израел ја повика Хрватска да ги прекине дипломатските односи со Иран

Израелскиот амбасадор во Хрватска, Гари Корен, го повика Загреб целосно да ги прекине дипломатските односи со Техеран и да спроведе безбедносни проверки врз персоналот на иранската амбасада, велејќи дека меѓу нив може да има и членови на Револуционерната гарда, која ЕУ ја смета за терористичка организација.

Корен во интервју за Хина рече дека поголемиот дел од иранскиот дипломатски персонал е задолжен за „собирање разузнавачки информации“ и предупреди за постоењето на „скриени ќелии“ низ целиот Запад, вклучувајќи ги и САД.

Армин Хоџиќ, пратеник во хрватскиот парламент за национални малцинства, изјавата на израелскиот амбасадор ја опиша како „сериозно и неприфатливо мешање во суверените одлуки на Република Хрватска“.

Хоџиќ нагласи дека Хрватска одлучува за своите дипломатски односи во согласност со Уставот и дека странските амбасади не смеат да сугерираат политички одлуки.

Тој додаде дека дипломатијата треба да гради односи и меѓусебно почитување, а не да диктира ставови, и потсети дека ова не е прв пат Корен да се обидува да влијае врз надворешнополитичките одлуки на Хрватска и регионот, вклучително и Босна и Херцеговина.