Беспилотно летало се урна во станбена зграда во југоисточниот романски град Галати, во близина на границата со Украина, при што се повредени две лица и предизвикан е пожар, соопштија властите денес.
Генералниот инспекторат за вонредни состојби на Романија во објава на Фејсбук соопшти дека беспилотното летало погодило 10-катен станбен блок и дека околу 70 луѓе биле евакуирани.
„Во текот на ноќта меѓу 28 и 29 мај, Руската Федерација ги обнови нападите со беспилотни летала врз цивилни и инфраструктурни цели во Украина, во близина на речната граница со Романија“, соопшти Министерството за надворешни работи на земјата.
Министерството наведе дека беспилотното летало бил следено со радар пред да се урне во станбената зграда.
„Беспилотното летало влезе во романскиот воздушен простор, при што беше следено со радар до јужниот дел на град Галати, и се урна на покривот од блок станбени згради, а по ударот следуваше пожар“, се вели во соопштението.
Романија соопшти дека два борбени авиони Ф-16 полетале од воената база Фетешти, поддржани од хеликоптери на романското воздухопловство, додавајќи дека на местото на настанот биле испратени екипи за итни случаи, полиција и разузнавачки служби.
Романскиот министер за одбрана Раду Мируца денес изјави дека романските борбени авиони подигнати за време на рускиот напад врз украинската пристанишна инфраструктура имале овластување за дејатво, но дека дронот што ја погодил станбената зграда во Галац не можел да биде соборен без ризик за цивилното население и поголема штета на градот.
Мируца изјави дека дронот од типот „геран-2“ бил откриен и следен од радарот што неодамна бил инсталиран во областа Галац, по сличен инцидент што се случил пред две недели.
„Да, бил откриен и следен од радар во зоната Галац. Да, борбените авиони имале дозвола да дејствуваат. Но, во четирите минути додека бил во романскиот воздушен простор, не било можно да се дејствува без ризик ракетата да предизвика поголема штета во Галац“, објасни Мируца.
Тој објави дека веднаш го информирал шефот на државата и сојузниците од НАТО за инцидентот, како и дека имал телефонски разговор со генералниот секретар на Алијансата, Марк Руте.
