Претседателот на Европскиот совет, Антонио Кошта, објави дека во наредните денови ќе свика вонреден состанок на Европскиот совет поради настаните околу Гренланд и рече дека Брисел останува посветен на почитување на меѓународното право, територијалниот интегритет и националниот суверенитет.

„Со оглед на важноста на неодамнешните настани и заради понатамошна координација, решив да свикам вонреден состанок на Европскиот совет во наредните денови“, нагласи претседателот на Европскиот совет во објава на социјалната мрежа X.

Тој изјави дека ЕУ останува обединета во поддршката и солидарноста со Данска и Гренланд.

Во исто време, Кошта изјави дека земјите-членки на ЕУ, по консултациите за тензиите поврзани со Гренланд, го потврдија своето верување дека мирот и безбедноста на Арктикот се заеднички трансатлантски интерес, првенствено преку соработка во рамките на НАТО.

Според него, членките на ЕУ го делат ставот дека воведувањето царини би ги поткопало трансатлантските односи и би било некомпатибилно со трговскиот договор меѓу ЕУ и САД, со подготвеноста на Унијата да се одбрани од каква било форма на принуда.

Кошта ја нагласи подготвеноста на ЕУ да продолжи со конструктивниот дијалог со Соединетите Американски Држави за сите прашања од заеднички интерес.

Американскиот претседател Доналд Трамп во саботата се закани дека ќе воведе царини од 10 проценти од 1 февруари за стоки од Велика Британија, Норвешка и шест земји од ЕУ вклучени во арктичките воени вежби во Гренланд, кои би важеле додека не се постигне договор за купување на Гренланд од страна на САД.