Италијански воен авион бил погоден за време на нападот врз воздухопловна база во Саудиска Арабија, изјави во петок италијанскиот министер за одбрана Гвидо Кросето.

Кросето рече дека ја следи ситуацијата во воздухопловната база Таиф во Саудиска Арабија, која беше цел на неколку напади и каде што се присутни италијански војници како дел од операцијата „Инхерентна решителност“, објави новинската агенција АНСА.

Тој потврди дека во нападите нема повредени италијански воени лица.

„Италијански авион Ф-2000 беше погоден за време на нападот. Тој беше во базата, во затскриено подрачје. Немаше други штети на возилата или инфраструктурата што ја користеше нашиот персонал“, рече Кросето.

Тој додаде дека побарал дополнителни проценки за развојот на ситуацијата, состојбата на италијанскиот воен персонал и можните оперативни опции.

Кросето рече дека добил уверение дека сите безбедносни мерки за заштита на воениот персонал веќе се преземени.

„Ситуацијата се следи со најголема грижа, со цел да се обезбеди целосна заштита на нашиот персонал и да се дејствува со потребната одговорност“, додаде Кросето.

Саудиска Арабија се соочи со серија напади со ракети и беспилотни летала во последните денови, за кои одговорноста ја презедоа Хутите, во време на зголемени регионални тензии.

Судирите меѓу јеменските владини сили и Хутите се интензивираа и од почетокот на јули.

Обновените борби го прекинаа периодот на релативен мир што во голема мера траеше од стапувањето во сила на прекинот на огнот посредуван од ОН во април 2022 година.