Десет најплатени фудбалери во светот во 2025 година

Кристијано Роналдо предводи група од десет фудбалери кои ќе заработат вкупно 945 милиони долари оваа сезона. Додека полека се спушта завесата на неговата кариера, се појавуваат два млади таленти.

За краток период ова лето, се чинеше дека Кристијано Роналдо е на работ да ја заврши својата славна фудбалска кариера. 40-годишниот напаѓач се ближеше кон крајот на договорот со клубот од саудиската професионална лига, Ал Наср, каде што играше од 2023 година, и ја водеше Португалија до победа во Лигата на нации на УЕФА, давајќи му можност да ги закачи копачките на врвот од својата кариера.

Но, Роналдо брзо ги отфрли шпекулациите за пензионирање и го продолжи договорот со Ал Наср за уште две години.

„Мислам дека сè уште правам добри работи; им помагам на клубот и на репрезентацијата“, изјави тој за португалската телевизиска мрежа Канал 11 во октомври. „Зошто да не продолжам?“

Форбс проценува дека Роналдо ќе заработи 230 милиони долари од Ал Наср во текот на сезоната 2025/2026, а таа бројка вклучува комерцијални стимулации од спонзорски договори што ги обезбеди клубот, покрај неговата основна плата.

Кога на таа сума ќе се додадат 50-те милиони долари што ќе ги заработи надвор од теренот - благодарение на партнерствата со брендови, португалската суперѕвезда ќе заработи вкупно 280 милиони долари (пред даноци и агентски такси) следната година.

Оваа импресивна сума, која е приближно во согласност со проекциите на „Форбс“ за сезоната 2024/2025, го враќа на врвот на листата на најплатени фудбалери во светот - по шести пат во последните десет години.

Астрономските заработки на Роналдо го ставаат далеку пред неговиот долгогодишен ривал Лионел Меси од Интер Мајами, кој е втор на листата на Форбс со очекувана заработка од 130 милиони долари.

Севкупно, се очекува 10-те најплатени фудбалери во светот да заработат вкупно 945 милиони долари во сезоната 2025/26. Прагот за влез на оваа листа за сезона се искачи на 43 милиони долари, иста сума колку што заработи и тинејџерската сензација на Барселона, Ламин Јамал - во споредба со минатогодишниот праг од 39 милиони долари за Кевин Де Брујне од Манчестер Сити.

И покрај тоа, вкупните приходи на десеттемина најплатени фудбалери се намалија за речиси четири отсто во однос на сезоната 2024/2025, главно поради тоа што Нејмар, кој беше трет на ланската листа и еден од најплатените фудбалери во историјата, целосно испадна од рангирањето.

Минатата сезона, бразилската ѕвезда требаше да заработи 110 милиони долари, од кои 80 милиони од договорот со клубот Ал Хилал. Сепак, во јануари тој спогодбено го раскина договорот со клубот и се врати во Сантос, својот матичен клуб во Бразил, со значително намалување на платата.

Иако во јуни потпиша нов договор кој, според наводите, му дава можност да остане до Светското првенство во 2026 година, „Форбс“ проценува дека Нејмар оваа сезона ќе заработи само 38 милиони долари, најголемиот дел од нив надвор од теренот.

Двајца нови на листата

Поради неговото заминување, како и на Де Бројне, кој го напушти Манчестер Сити и премина во Наполи, се отворија две места меѓу десеттемина најплатени. Но, и покрај фактот што англиските клубови ова лето потрошија рекордни четири милијарди долари на трансфери, листата и понатаму ја доминираат осум познати имиња, од кои ниту едно не го смени клубот ова лето.

Карим Бензема го зазеде третото место со очекувана вкупна заработка од 104 милиони долари, додека ја одработува последната година од договорот со Ал Итихад во Саудиска Арабија.

Килијан Мбапе од Реал Мадрид (проценети 95 милиони долари) се наоѓа на четвртото место, а Ерлинг Халанд ја заокружува топ 5 листата. Норвежанецот во јануари потпиша продолжување на договорот на девет и пол години со Манчестер Сити, во екот на уште една одлична сезона со 22 гола на 31 натпревар во Премиер лигата.

Неговиот нов договор му ја зголемува проценетата плата и бонусите на 60 милиони долари во сезоната 2025/2026, со дополнителни 20 милиони долари приходи надвор од теренот.

Најмногу од шпанската лига

Винисиус Жуниор се враќа на листата на шестото место со очекувани 60 милиони долари, но повеќе не е најмладиот во рангирањето. Неговиот соиграч од Реал Мадрид, Џуд Белингем, кој годинава е на деветтото место со 44 милиони долари, има 22 години – но и тој е постар од ѕвездата на Барселона, Ламине Јамал, првиот 18-годишник кој влезе на листата на „Форбс“ откако таа се води (веќе 22 години).

Овие двајца ѝ даваат предност на шпанската Ла Лига, која има четворица претставници на листата. Следува Саудиската Про лига со тројца – Роналдо, Бензема и Садио Мане (Ал Наср, 8. место, 54 милиони долари) – додека Премиер лигата има двајца: Халанд и Мохамед Салах од Ливерпул (7. место, 55 милиони долари).

Меси останува единствениот претставник на МЛС лигата.

Уште поважно, доаѓањето на Белингем и Јамал најавува смена на генерации во светскиот фудбал. Пет од десеттемина најплатени фудбалери имаат 29 години или помалку – најголем удел од 2020 година – а просечната возраст на листата падна под 30 години, што е најниско ниво во последните пет години.

Кристијано Роналдо и понатаму води по заработка, но младите „лавови“ веќе тропаат на вратата – подготвени да го преземат и спортскиот и финансискиот трон на светскиот фудбал.