Постојат места каде часовникот чука поинаку. Грљани е едно такво место- мало планинско село во Источна Македонија, сместено помеѓу Голак, Плачковица и Осоговските Планини, на речиси 800 метри надморска височина и над сиот градски метеж.

Токму тука, во село со стотина жители, младиот брачен пар Ања и Николче Јанчов го изгради она за кое мнозина само сонуваат- живот по свои мерки. Во разговор со екипата на ТРТ Балкан, двајцата ја споделија приказната за враќањето кон едноставноста, за одгледувањето на нивниот малечок син Богдан во средина богата со чист воздух и вредности, и за „Бабин", брендот кој го создадоа со свои раце и на кој сѐ уште работат посветено и со љубов.

Николче, по образование електро инженер, признава дека градскиот живот му направил да се чувствува како да го изгубил патот. 

„Мојот животен стил и моите идеали не се движеја кон целта по која тргнав. Едноставно одев во Скопје да правам пари. Јас се изгубив во тој град", вели тој. Враќањето на село не беше бегство. Беше избор.

Ања дошла од сосема поинаков свет- центарот на Нови Сад, каде природата значела прошетка во парк. 

„Јас не знаев коренче на домат како изгледа додека не дојдов тука. Беше шокантно, но многу позитивно", се смее таа. Денес токму таа го моделира „Бабин" во визуелен идентитет, применувајќи го графичкиот дизајн на што дипломирала во Србија- на етикети кои мирисаат на мајчина душица и планинска роса.

Нивниот производствен процес е речиси медитативен: бербата на диви билки од незасегнатите планини, сушењето на сито, полнењето мед кој поради висината доаѓа потемен, побогат и подоцна во текот на годината, дури во јули и август. 

„Тоа што тука ќе го имаш не се купува со пари. Мирот, природата, воспитувањето", вели Николче, со погледот кон брдата.

Во свет каде сите бараат брзи одговори, Ања и Николче ни нудат производ кој расте полека, со причина. 

„Сакаме да покажеме дека има друга опција освен градот, не само да се успее, туку да се живее убаво", порачува Николче.

Грљани. Стотина жители. Зуеж на пчели наместо сирени. Далечина без интернет-сигнал, велат некои. Иднина во која верува едно семејство, велат Ања и Николче.