Португалскиот стратег Рубен Аморим доби отказ од управата на Манчестер Јунајтед по неделното реми на гостувањето кај Лидс (1:1). Тој издржа помалку од 14 месеци на жешката клупа на Јунајтед.
Отказот следеше по жестоката прес-конференција на Аморим по натпреварот со Лидс, на која индиректно ги прозва сопствениците и управата за лошите резултати и посочи дека дел од спортскиот сектор не ги извршува своите функции на соодветно ниво.
„Не се викам Томас Тухел, ниту Антонио Конте, ниту Жозе Мурињо, но јас сум менаџер на Јунајтед. Дојдов тука да бидам менаџер, а не тренер... Луѓето во секој оддел, од скаути до спортски директор, мора да си ја работат работата. Јас ќе ја работам мојата уште 18 месеци и потоа одиме понатаму. Тоа беше договорот. Не сум тука само да бидам тренер на теренот“, порача децидно Аморим, кој потоа ја напушти прес-конференцијата.
Португалецот беше на клупата на „Црвените ѓаволи“ од ноември 2024 година.
„Додека Манчестер Јунајтед е на шестото место во Премиер лигата, управата на клубот неволно одлучи дека е вистинско време да направи промена. Ова ќе ни даде најголема шанса за подобра позиција во Премиер лигата“, објави Манчестер Јунајтед.
Аморим пристигна на чело на клубот од Олд Трафорд како успешен тренер на Спортинг, со кого беше двапати шампион на Португалија (2020/21, 2023/24). Сепак, неговите резултати во Јунајтед беа далеку под очекувањата.
Минатата сезона, Јунајтед заврши на 15-то место во Премиер лигата под водство на Аморим со 42 бода, што е најлошиот резултат по бодови од сезоната 1973/74, кога испаднаа во втората лига. Тој можеше да ја спаси сезоната со освојување на Лигата на Европа, што ќе му донесеше на клубот место во Лигата на шампионите, но Јунајтед беше поразен со 0:1 од Тотенхем во финалето.
Во последните 11 натпревари во сите натпреварувања, „Црвените ѓаволи“ имаат само три победи.
Тимот привремено ќе го води поранешниот играч на Јунајтед, Дарен Флечер, кој беше задолжен за тимот до 18 години на клубот од „Олд Трафорд“ оваа сезона.
Аморим ги напушта „Црвените ѓаволи“ како статистички најнеуспешен менаџер на ерата од Алекс Фергусон.
Под негово водство, Јунајтед ја имаше својата најлоша сезона за повеќе од половина век и го пропушти пласманот во Европа само втор пат за 35 години.
Португалецот е шестиот менаџер на Јунајтед, без да се сметаат привремените менаџери, откако легендарниот Сер Алекс се пензионираше, а Аморим има убедливо најнизок процент на победи, само 36,9%.
Најуспешен беше Жозе Мурињо со 58,33% победи, по него следуваа Ерик Тен Хаг со 54,69% и Оле Гунар Солскјер со 54,17%. Дејвид Мојес имаше 52,94%, а Луј Ван Гал 52,43%.
