Германскиот министер за надворешни Јохан Вадефул изјави дека Европа мора да има „централна улога“ во преговорите за иднината на Украина, во пресрет на планираните разговори меѓу претставниците на Киев, Москва и Вашингтон во Абу Даби.

Пред неговата посета на Варшава, каде што треба да се сретне со своите колеги од Советот на државите од Балтичкото Море, Вадефул го нагласи она што го нарече „непоколеблив принцип“ за Германија.

„За иднината на Украина не смее да се одлучува без Украина. А за безбедноста на Европа не смее да се одлучува без Европа“, рече Вадефул.

„Ова е мерилото за сите наши напори да се стави крај на руската агресорска војна, како и причината поради која Европа мора да има централна улога во овој процес“, додаде тој.

Претставници од Киев, Москва и Вашингтон треба да се сретнат следната недела во Абу Даби, што ќе бидат нивните први трилатерални разговори по неколку месеци.

Последните преговори во овој тристран формат се одржаа во Женева во февруари. Пред тоа, имаше две рунди преговори во Абу Даби.

Вадефул додаде дека резултатите од средномандатните избори во САД ја истакнуваат важноста од континуираната поддршка за Украина, со цел постигнување траен мировен договор и обезбедување на безбедноста на Европа.

„Затоа е од суштинско значење ние, како трансатлантски сојуз, како Европејци и Американци, да заземеме обединет и цврст став против Русија“, додаде германскиот министер.