Извршниот директор на „Јутјуб“, Нил Мохан, ја отфрли идејата за приклучување кон правната спогодба на „Мета“ која ги поседува социјалните мрежи „Фејсбук“ и „Инстаграм“, фокусирана на безбедноста на малолетниците, тврдејќи дека Јутјуб веќе има мерки кои се креирани за заштита на помладите корисници.

„Вложувавме во тоа младите луѓе да бидат безбедни на нашата платформа... веќе многу долго време и Јутјуб ќе продолжи да им дава приоритет на тие напори“, изјави Мохан.

Мета неодамна се согласи на спогодба од 18 милијарди долари со повеќе американски сојузни држави околу наводите дека нејзините платформи биле дизајнирани на начини што поттикнувале зависност и придонеле за криза на менталното здравје кај младите.

Компанијата ги повика конкурентите, вклучувајќи ги Јутјуб и ТикТок, да усвојат мерки слични на оние кои се вклучени во нејзината спогодба.

Овие предлози вклучуваат ограничување на времето што тинејџерите можат да го поминат на платформите, отстранување на бројот на „лајкови“ за тинејџерските профили и воведување независен надзор на безбедносните практики.

Јутјуб објави неколку нови функции за креаторите и гледачите, вклучувајќи дополнителни алатки со вештачка интелигенција и можности за размена на пораки.

Мета постигна спогодба додека тужбата сè уште беше во тек и го претстави договорот како голем чекор кон подобрување на безбедноста на младите луѓе на интернет.

Компанијата, исто така, објави реклами и упати јавни апели охрабрувајќи ги другите платформи да усвојат слични мерки.

Според условите на договорот, „Мета“ изјави дека ќе плати само 70% од износот на спогодбата, освен ако „ТикТок“ и „Јутјуб“ не се согласат да придонесат по околу 6 милијарди долари поединечно и да спроведат видливи безбедносни мерки.

Генералниот обвинител на Калифорнија, Роб Бонта, исто така, изјави дека државите би можеле да покренат правни мерки против ТикТок и Јутјуб доколку одбијат да учествуваат.

Сепак, Мохан посочи на мерките што Јутјуб веќе ги има воведено, вклучувајќи ги и родителските контроли што им овозможуваат на родителите да го ограничат времето што тинејџерите го поминуваат гледајќи кратки видеа.

Тој исто така рече дека Јутјуб се консултира со независни експерти при развивање функции за безбедност на децата.

„Ние сме многу различна платформа (од Мета)“, рече Мохан, истакнувајќи дека Јутјуб се фокусира и на зголемување на количината на содржина што корисниците ја гледаат на телевизиските екрани во своите домови.

ТикТок не одговори јавно на повиците да се придружи на спогодбата на Мета.

Канцеларијата на Бонта, исто така, не одговори веднаш на барањето за коментар за ставот на Мохан.

Во одделен случај, Јутјуб и Мета беа прогласени за одговорни во март откако судењето во Лос Анџелес заклучи дека компаниите намерно ги дизајнирале своите платформи на начини што придонеле за зависноста и проблемите со менталното здравје на една млада жена. Двете компании изјавија дека имаат намера да поднесат жалба на пресудата.

Портпаролот на Јутјуб претходно тврдеше дека пресудата погрешно ја разбрала платформата, опишувајќи го Јутјуб како одговорно дизајнирана услуга за стриминг, а не како платформа за социјални медиуми.

Порано оваа година, Јутјуб реши слична тужба поднесена од друг тинејџер.

ТикТок и Снеп исто така постигнаа спогодби во тој случај, додека тужбите против Мета беа отфрлени.

И покрај овие спогодби, сите четири компании продолжуваат да се соочуваат со стотици тужби од поединци, семејства и училишни окрузи во кои се тврди дека нивните платформи им наштетиле на младите корисници.