Институтот за јавно здравје прогласи епидемија на западнонилска треска во делови од Скопје, во општините Кисела Вода, Бутел, Гази Баба и Илинден.

Едно лице на возраст од 83 година од Скопје почина како последица на компликации од заразата со западнонилска треска и други заболувања.

Според здравствените власти, од почетокот на годината има 26 пациенти заболени од западнонилска треска, а двајца се водат како сомнителни. Од нив, 25 лица се од Скопје, а еден е од Велес.

„Станува збор за автохтони случаи од нашата држава, а едно лице патувало во Грција. Сите случаи се со невроинвазивна форма“, изјави д-р Марија Гочевска од Институтот за јавно здравје (ИЈЗ) на денешната прес-конференција.

Дваесет пациенти се хоспитализирани на Инфективната клиника, од кои пет се во тешка состојба. Најголем дел од заболените се возрасни граѓани, односно 22 лица од заболените се на возраст над 60 години.

Здравствените власти апелираат на посебно внимание и превенција кај повозрасните лица и хронично болните, со оглед на тоа што кај овие категории постои значително поголем ризик од развој на потешка форма на болеста.

Здравствените власти препорачуваат граѓаните да ставаат мрежи, да се прскаат со средства и да не излегуваат кога заоѓа сонцето и рано наутро.

Најавени се и вонредни прсакања против комарци и преземање соодветни мерки за намалување на ризиците од пренос на болеста која ја шират овој вид инсекти.